SuperDizionari

plomp adi., s.m.

Metal une vore pesant e tenar, clâr e slusint a pene lavorât, al devente grîs a contat cul aiar

esempi

"becins di plomp e di arint"

da "Amîs come prime" di Alan Brusini

"al fâs une largje buse tes breis dal cuviert, al tire sù un bandon di plomp, lu plee e al cjale fûr"

da "Friûl e furlans te Histoire de ma vie di Giacomo Casanova" di Pierluigi Visintin

plomp s.m.inv., adi.inv.

Colôr grîs scûr, ancje in locuzions o metaforis

esempi

"un cîl di plomp al tignive scuindût il soreli"

da "Il drâc" di Gianfranco Pellegrini

plomp s.m.

Sigjîl fat di chel metal

esempi

"par vierzi la casse bisugne rompi i plomps"

plomp s.m.

[TS] (tecn.) Pês di chel metal tacât insom di un fîl par vê un riferiment di linie verticâl

sinonimi

plombin

esempi

"il grop al svolà par aiar fin sot dai trâfs e po al tornà jù come un plomp"

da "Chei di Martrent" di Riedo Pup

plomp s.m.

Cualsisei robe che e pese (fig.)

sinonimi

pês

esempi

"cuant che lu poiarin sul vert, cul so plomp cence vite, 'Sefut al veve i voi disledrosâts"

da "Chel svampît di 'Sefut" di Maria Forte

plomp s.m.

(tipogr.) Leghe che e à dentri chel metal, doprade par fondi i caratars di stampe e par metonimie, ogni caratar o dute la composizion tipografiche fate cun chê leghe

esempi

"cetancj cuintâi di plomp antiregjonalist tes rotativis talianis in chescj dîs!"

da "La regjon in pericul" di Josef Marchet

plomp s.m.

Proietil di arme di fûc

esempi

"a Cefalonie tancj soldâts talians a vevin pierdude la lôr muse zovine, sot il plomp dai todescs"

da "Cjase di Dalban" di Maria Forte

"la plui brute Pasche, puar Vergjilio, e fo chê de Russie, cuant che une sborfade di plomp lu seà in pîts, te nêf"

da "Vergjilio" di Riedo Pup

plomp s.m.

Il colâ jù

esempi

"a colp un pît in fal, un zigo e un plomp e il scûr de trombe [dal fen] le glotè"

da "Il muc" di Roberto Ongaro

"cumò chel grop di cuarps al rodole sul arzin, i claps a corin jù saltant fin ta la aghe, e po un plomp: la aghe e sclipignà, si savoltà, si inturbidì"

da "La aghe da pît la cleve" di Dino Virgili

"Vergjilio lu cjapà [il cjadenaç, par netâlu] pal prin rimpin e lu butà un plomp ta la aghe fonde"

da "Vergjilio" di Riedo Pup

monolingue