SuperDizionari

presint adi., s.m.
(pre-sint)

Che, cui che al è tal puest di cui che al fevele o tun puest che al è clâr dal discors

esemplis

"no si podeve scomençâ vuê i lavôrs, che no son presints ducj i comissaris"

gjavât fûr di "Memoriis di politiche linguistiche" di Adrian Cescje

"[pe leture dal testament] a jerin presints in cinc, ma il perît ur veve dit che lis parts a scugnivin sei sîs"

gjavât fûr di "Destins" di Pieri Menis

"ducj i presints a puedin dîus i vantaçs e i merits de cooperazion"

gjavât fûr di "La cjase di Toni" di Tarcisio Venuti

Viôt ancje: prisint

presint adi.
(pre-sint)

Ben clâr tal pinsîr, te memorie, te atenzion e v.i.

esemplis

"al veve presint ogni moment di chê sere che si jere inacuart di une magle rosse [un pussibil tumôr] su la piel di Barbure"

gjavât fûr di "Spietant" di Agnul di Spere

presint adi.
(pre-sint)

Che al sucêt in chest moment o in contemporanie cul timp di une narazion

sinonims

atuâl, dal dì di vuê, di cumò, di vuê

esemplis

"si sa che lis cjossis no podaressin jessi diferentis intun ordenament politic come chel di cumò [...] e je une fatalitât de situazion presinte"

gjavât fûr di "Dissipline" di Josef Marchet

presint s.m.
(pre-sint)

Timp che al è cumò

sinonims

vuê

esemplis

"l'avignî nol jere ancjemò e il presint nol durave, e al sbrissave subit tal passât"

gjavât fûr di "Ombris tal infinît" di Carlo Sgorlon

presint adi., s.m.
(pre-sint)

[TS] (gram.) Timp verbâl che al segne che la azion e sucêt in chest moment o che e je cence riferiment di timp prticolâr

esemplis

"tal indicatîf presint dal verp jessi, la tierce persone singolâr declarative masculine (al è) e je diferente de tierce persone singolâr feminine (e je)"

gjavât fûr di "Lenghe e culture" di Maria Chiara Visintin, Gabriele Zanello

presint s.m.
(pre-sint)

[BF] Robe che si da par zentilece, par fâ plasê, par ricognossince e v.i.

sinonims

don, regâl

esemplis

"i saverin a grât, l'avocat e la siore Camile, a mestri Checo! Ben, al fo propit in chê volte che i faserin il presint di cheste pipe francese"

gjavât fûr di "Cretevierte" di Roberto Ongaro

monolengâl