SuperDizionari

rapuart s.m.
(ra-puart)

Leam fra dôs o plui robis, personis, elements

sinonims

relazion, leam

esemplis

"o cjamini tal scûr di bessôl cu la mê malinconie a cirî un sens uman, un rapuart di anime fra cheste maluserie stratignude e chel mont difûr"

gjavât fûr di "In scolte..." di Dino Virgili

"dome i prins agn al veve sintût un rapuart tra i siei delits e la galere che i vevin dade. Daspò chel rapuart si jere discolorît simpri di plui, fin a sfantâsi cuasi dal dut"

gjavât fûr di "Prime di sere" di Carlo Sgorlon

Viôt ancje: repuart

rapuart s.m.
(ra-puart)

[TS] (mat.) Cuozient di doi numars o grandecis

esemplis

"se nô o fasìn il rapuart jenfri numar di iscrits e vôts cjapâts a lis elezions o viodìn come regule che il partît locâl al à un rapuart une vore plui alt (par esempli il SNP di chei agns al veve un rapuart ator dal 50% [...])"

gjavât fûr di "Il risultât eletorâl dai partîts di identitât teritoriâl - A case study: Scottish National Party" di Sergio Cecotti

rapuart s.m.
(ra-puart)

Spec. tal pl., mût di vê a ce fâ tra personis, istituzions, nazions e v.i.

sinonims

relazion

esemplis

"jo cun mê mari o ai un bon rapuart"

gjavât fûr di "Sul florî" di AAVV

"movisi ogni dì al fâs ben ae salût fisiche e psichiche: [...] al incrès la stime di se stes e al jude a disvilupâ rapuarts sociâi"

gjavât fûr di "Metiti in moto!" di Guglielmo Pitzalis

"chestis trê regjons [Friûl, Carintie e Sclavanie] a varessin prin di dut dibisugne di une cierte libertât di rapuarts e di scambis par podê judâsi tra di lôr"

gjavât fûr di "Un element fondamentâl dal moviment autonomistic" di Josef Marchet

rapuart s.m.
(ra-puart)

Relazion sentimentâl

sinonims

relazion

esemplis

"il lôr al jere un rapuart strac, sfiliât di dutis lis bandis"

gjavât fûr di "Il sium di Lissandri" di Franca Mainardis

rapuart s.m.
(ra-puart)

Esposizion scrite o verbâl di fats, acjadiments, situazions e v.i.

sinonims

descrizion, referât, relazion, rifierte, distese, esposizion

esemplis

"dâts preocupants intal ultin rapuart dal Osservatori sociâl e economic su la criminalitât"

gjavât fûr di "La sgrife de mafie su la economie dal Nord" di Redazion il Diari

"dal rapuart che i fasè l'assistent, Pieri al vignì a savê che si tratave di un contadin. Si veve fat mâl taiant lens cu la see eletriche"

gjavât fûr di "Tal ospedâl" di Amedeo Giacomini

rapuart s.m.
(ra-puart)

[TS] (dir.pen.) At di denunzie di un reât de bande di un uficiâl public

esemplis

"dal rapuart de Polizie al risulte che o sês stâts “gli autori principali promotori ovvero arditi esecutori” dai disordins e des violencis che, in chê dì, a son stâts su la place e dentri il palaç comunâl"

gjavât fûr di "Int di masnade" di Alviero Negro

rapuart s.m.
(ra-puart)

[TS] (milit.) Cunvigne di uficiâi par cjapâ ordins e comunicazions

monolengâl