SuperDizionari

responsabil adi., s.m.
(res-pon-sa-bil)

Che, cui che al à di decidi e di rispuindi des consecuencis di une cierte sielte, azion o situazion

esemplis

"ce valôr podevie vê la sô tenarece se no mi rispietave par ce che o soi? Se no mi lassave di bessole inte mê solitudin di mari - responsabile de vite che o vevi dentri - a decidi jo dal gno stâ e fâ?"

gjavât fûr di "Trê feminis" di Gianni Gregoricchio

"Cavedalis nol volè savênt di spostaments rispiet al plan concuardât cui imperiâi, parcè che al si sintive e al jere responsabil de sô atuazion cence incidents"

gjavât fûr di "Zuan Batiste Cavedalis - Une vite esemplâr" di Giovanni Pillinini

responsabil adi., s.m.
(res-pon-sa-bil)

Che, cui che al à di viodi di alc o di cdn., soredut cuntune funzion di autoritât, di comant, di control

esemplis

"e lui mi à stropade la bocje e comandât di tasê: al mi à dit che di chest [de situazion de sô famee] al è responsabil lui e la autoritât le à lui"

gjavât fûr di "Lis predicjis dal muini" di Josef Marchet

"il siôr Sergjo Cristin di Sant Zorç di Nuiâr, studiôs passionât di furlan, rispuindint a un invît de Filologjiche al à segnalât ai responsabii de Societât une impuartante novitât e raritât linguistiche"

gjavât fûr di "Il furlan al jentre in tribunâl" di Riedo Pup

responsabil adi., s.m.
(res-pon-sa-bil)

Che, cui che al à o che al mostre cussience tal compuartament, che al à o che al mostre cualitâts psichichis e un ecuilibri di persone che e je in grât di rispuindi di ce che e fâs

sinonims

cussient, cussienziôs, seri, madûr

esemplis

"la scuele e à di tirâ sù int libare, int madure e responsabil, int che no ubidìs a voi sierâts ma che e conteste la leç no par gust de anarchie ma par fânt une miôr"

gjavât fûr di "Un popul e la sô scuele" di Antoni Beline

responsabil adi., s.m.
(res-pon-sa-bil)

Che, cui che o ce che al è cause di un efiet, di une consecuence, dispès negative

esemplis

"Rico si domandave se podeve jessi vere che Edo - cussì frut, nassût e cressût tal stes borc - al fos pardabon responsabil ancje lui de muart di chei doi vielis"

gjavât fûr di "La clape" di Gianni Gregoricchio

"fasìn l'interogatori, finalmentri a di chei responsabii dai disordins dal tredis di Mai"

gjavât fûr di "Int di masnade" di Alviero Negro

monolengâl