SuperDizionari

rindi v.tr.
(rin-di)

Dâ come util, fâ vuadagnâ (ancje ass.)

sinonimi

dâ, fâ, frutâ, produsi

esempi

"Herr Müller lu veve tignût di capuçat parcè che i rindeve"

da "La tiere di Lansing" di Maria Forte

"il cjarvonêr al fai i conts in cjâf il fouc distudât: il bosc di Viea a i à rindût na tassa di cjarti da cent"

da "I cjans di not" di Novella Cantarutti

"cuant che si risulte tant puars [...] al vûl dî: o che no si à cuele di lavorâ, o che no si è bogns di lavorâ, o che si à sielt un mistîr che nol rint"

da "Une robarie ogni miezore" di Riedo Pup

rindi v.tr.
(rin-di)

Fâ vê tant che prodot (ancje ass.)

sinonimi

fâ, ufrî

esempi

"un sgrusui che nol paie la strussie, che al rint dome cjanussis"

da "Cjase di Dalban" di Maria Forte

rindi v.tr.
(rin-di)

Produsi un efiet positîf (ancje ass.)

sinonimi

butâ, dâ, fâ, jentrâ, produsi, reonâ, vignî

esempi

"se i capite la fortune di pescjâ a pene il doi di briscule, garantît che chel doi lu fâs rindi tant che un as"

da "Politiche estare dal Friûl" di Riedo Pup

"une buine opare cuissà cualchi volte ce che e po rindi…"

da "Vilie di Nadâl" di Pieri Somede dai Marcs

rindi v.tr.
(rin-di)

Fâ deventâ

sinonimi

fâ, ridusi

esempi

"chê grant passion par la art che rint amîs e fradis i umign ancje se son di nazion e di raze divierse"

da "La Madalene" di Zuan Lurinçon

"il gnûf formalisim sientific al rindeve simpri plui impussibil formulâ domandis “metafisichis” in forme “sientifiche”"

da "Teologjie algjebriche" di Sergio Cecotti

"la esperience lu rint om di mistîr"

da "Il mût di fâsi siôrs" di Pieri Çorut

rindi v.tr.
(rin-di)

Fâ capî, comunicâ, dâ une buine rapresentazion

esempi

"la traduzion par furlan e rint plui clarementri il pinsîr di Einstein che no altris versions che a ripuartin la traduzion leterâl dal test todesc"

da "L'articul di Einstein dal 1905 sul efiet fotoeletric. Un lavôr plurilengâl voltât in lenghe furlane" di Lorenzo Marcolini

"i fotografs professioniscj a rivin a rindi dut miôr cu lis lôr tecnichis e i zûcs di lûs"

da "La maree nere" di Checo Tam

rindi v.tr.
(rin-di)

Comunicâ, fâ savê

esempi

"o ai pensât di rindi cheste testemoneance e di consegnâ il materiâl al Museu Civic di Udin"

da "Une lance langobarde cjatade a Baracêt" di Lucio Perès

rindi v.tr.
(rin-di)

Butâ fûr ce che si à mangjât o bevût (eufem.)

sinonimi

rindi fûr, butâ fûr, gomitâ

esempi

"o ai scugnût cjapâmi sù e lâ intun altri scompartiment, se no o rindevi il gustâ, di tant che mi vevin ingomeât"

da "Lis predicjis dal muini" di Josef Marchet

rindi v.tr.
(rin-di)

[BF] Pleâ, bati, obleâ a rindisi

esempi

"la agna Arminia che a era fata a la sô moda [...]. A veva cjâf e cour e un temperamint che, cui la rindeva?"

da "Stagjon di rosi" di Novella Cantarutti

rindi v.tr.
(rin-di)

[BF] Dâ o dâ indaûr alc che si veve vût, o alc in cambi di ce che si veve vût, ancje in riferiment a robis astratis o a cundizions, situazions e v.i. (ancje fig.)

sinonimi

restituî, dâ, tornâ indaûr, tornâ, dâ indaûr

esempi

"jo i ti rint il gno amôr, la libertât"

da "La lienda da contessa Priola" di Giorgio Ferigo

monolingue