SuperDizionari

rituâl s.m.
(ri-tu-âl)

Complès di azions e frasis codificadis che a àn soredut une finalitât simboliche religjose

esemplis

"al veve di jessi un rituâl une vore antîc, che ogni an lu ripetevin in dutis lis glesiis dal mont"

gjavât fûr di "Prime di sere" di Carlo Sgorlon

"i rituâi religjôs plui antîcs a àn ce fâ cul cult dai muarts"

gjavât fûr di "Il cjâf dai furlans" di Franc Fari

Viôt ancje: rît

rituâl s.m.
(ri-tu-âl)

(lit.) Inte Glesie catoliche, libri dulà che a son tignudis dentri lis regulis e lis formulis di doprâ in sacraments e cerimoniis

esemplis

"il plevan cu la cuete che e scampanotave su lis maniis e la stole tiessude di fîi di aur che i sui zenoi, sul asperget, il rituâl e doi fruts par bande, un cul cjalderin da la aghe sante e chel altri cu la zee pai ûfs, al scomençâ a fâ il zîr par benedî lis cjasis"

gjavât fûr di "Par une lengate" di Pieri Somede dai Marcs

rituâl s.m.
(ri-tu-âl)

[TS] (etol.) Compuartament che si fonde suntune secuence di elements che a cjapin un significât particolâr inte comunicazion sociâl

rituâl adi.
(ri-tu-âl)

Che al è propri di un at simbolic cerimoniâl, che al à finalitats simbolichis

esemplis

"nainis rituâls che a vevin il savôr velât di une medisine pagane"

gjavât fûr di "Une speziarie te cjanive" di Margherita Timeus

"la agressivitât mortâl dentri de specie si à stramudade intune schirie di puartaments rituâi par fermâ la coparie fra individuis de stesse specie"

gjavât fûr di "Il cjâf dai furlans" di Franc Fari

rituâl adi.
(ri-tu-âl)

Che al sucêt o che si fâs simpri e che al à formis fissadis dal costum (fig.)

sinonims

usuâl, solit

esemplis

"subit al jere comparît il so amì e dute une schirie di oms e di feminis che i vevin fat fieste, tant che lui al fos stât l'ospit plui spietât. Daspò lis presentazions rituâls, Lissandri si jere cjatât intune grande cusine"

gjavât fûr di "Il sium di Lissandri" di Franca Mainardis

monolengâl