SuperDizionari

rivoluzion s.f.
(ri-vo-lu-zi-on)

Savoltament profont, in gjenerâl ancje svelt e violent, dal ordin politic e sociâl che al vûl cambiâ di plante fûr guvier, istituzions, rapuarts, relazions economichis e sociâls

sinonimi

messedament, ribaltament, ribalton, savoltament, voltament

esempi

"la rivoluzion di Viene [dal 1848] che e lassave cence diretivis lis autoritâts militârs e civîls di chescj paîs"

da "Cuintristorie dal Friûl fin sot la Italie" di Josef Marchet

"i moviments dai sindacâts no son che un pas de rivoluzion, cheste e je la nestre politiche"

da "Un pugn di moscjis" di Pieri Somede dai Marcs

rivoluzion s.f.
(ri-vo-lu-zi-on)

Mudament svelt e radicâl di un sisteme economic e sociâl par vie di scuviertis sientifichis gnovis e tecnologjichis

sinonimi

messedament, savoltament, voltament

esempi

"la idee di semenâ vuardi, forment e altris plantis [...] e fo une des primis rivoluzions te storie de umanitât"

da "Il cjâf dai furlans" di Franc Fari

"la proletarizazion e fo in Ingletiere la cundizion de rivoluzion industriâl"

da "Liniis di storie sociâl e economiche dal Friûl 1500 – 1800" di Adrian Cescje

rivoluzion s.f.
(ri-vo-lu-zi-on)

Grande confusion (fig.)

sinonimi

confusie, diauleç, disastri, messedament, mismàs, ribaltament, savoltament, tananai, voltament, confusion

esempi

"e si visaiso, in chê volte de vuere, ce rivoluzion di feminis che e je nassude là jù, a Gargagnà Disot? [...] a vevin tacât a puartâ sui scjalins dal altâr de Madone de Cinture i ritrats dal om o dal fi o dal morôs, che a jerin soldâts"

da "Lis predicjis dal muini" di Josef Marchet

rivoluzion s.f.
(ri-vo-lu-zi-on)

Cualsisei mudament une vore svelt e radicâl

sinonimi

messedament, ribaltament, savoltament, voltament

esempi

"[la laveblancjarie e je] la vere grande rivoluzion di chei agns, par vie che e regale timp libar, massime aes feminis, [...] par vuadagnâsi une gnove indipendence"

da "Cuintristorie dal Nûfcent 1950-1960" di Angelo Floramo

"sul fat des vergognis po, la gnove culture e à parturît adiriture une rivoluzion: chês che si diseve no son plui vergognis, ma valôrs"

da "I furlans e la mode" di Riedo Pup

rivoluzion s.f.
(ri-vo-lu-zi-on)

[TS] (astron.) Moviment orbitâl di un cuarp celest che al fâs une orbite elitiche intor di un altri

esempi

"par vie dal moviment di rivoluzion de Tiere ator dal soreli e de inclinazion dal as di rotazion de Tiere rispiet al plan de sô orbite, vie pal an il soreli al fâs tal cîl un zîr aparent"

da "Archeoastronomie in Friûl" di Nando Patat

"par cognossi po il timp de lis fasis lunârs, ognun pol regolâsi daûr il pleniluni indicât calcolant 29 dîs e 5 oris par ogni rivoluzion"

da "Il me paîs" di Federigo Comelli

monolingue