SuperDizionari

ruspi adi.
(rus-pi)

Che al à une superficie iregolâr, cun elements che a dan infûr e che a tocjâju a gratin, a bechin e v.i.

sinonimi

ruvit

esempi

"la scusse ruspie dai pôi sul ôr da la aghe"

da "La aghe da pît la cleve" di Dino Virgili

"mi jeri impirât tun jet alt e glaçât jenfri doi linzûi ruspis"

da "I forescj" di Alan Brusini, Gian Paolo Linda

ruspi adi., s.m.
(rus-pi)

Che, cui che al à formis o manieris pôc delicadis, pôc rispietosis, pôc creançosis (fig.)

sinonimi

gropolôs, dûr, ruspiôs, salvadi, grintôs, ledrôs, malegraciôs, murgnon, muriot, mutrignot, scabrôs, scontrôs, grubian, ordenari, vilan

esempi

"al veve miôr dal sigûr une vite dure, cence fantasiis, cence fotis pluitost che une vite comude e sbrendulone; al veve miôr sì i siei montagnârs ruspis , scontrôs, ignorants - ma ancje bogns e ricognossints"

da "O sielç lis stelis" di Pieri Somede dai Marcs

"ma subit si inacuarzè che la sô vôs e jere masse ruspie e i someà di vê ancje mancjât di rispiet ae none"

da "Sul agâr" di Pieri Menis

"Gusto nol jere un ruspi o un malin. Par nuie!"

da "Cjase di Dalban" di Maria Forte

ruspi adi.
(rus-pi)

Che nol à gracie, finece, elegance

sinonimi

grês, grubian, ordenari, rustic

esempi

"dut il complès al da un messaç di preziositât lizere, in linie cu la influence joniche che e indolcìs la fature arcaiche des figuris e lis inricjìs di particolârs naratîfs e al fâs nete distinzion cu la essenzialitât ruspie des metopis dal Tesaur dai Sicions"

da "Viaç aes origjins dal Logos" di Adrian Cescje

"ai let cun plasê chisti storiutis, semplissis e scletis; pissuli rubutis, un pôc ruspiis par via dal fevelâ gurissan un pôc durut"

da "Prefazion a Storiutis gurissanis" di Ugo Pellis

monolingue