SuperDizionari

saltâ v.intr.
(sal-tâ)

Fâ fuarce e distacâsi dal dut de tiere par tornâ a vignî jù tal stes puest o intun altri

esemplis

"tal zîr di trê minûts i parons di cjase a rivin a segnâ: cross di Pezzella e Cornelius che al salte plui indalt di ducj chei altris e le bute dentri."

gjavât fûr di "Parma – Udinese 2-2" di Marc Stolf

"di ca e di là de strade e un esercit di cjanis di palût e 'savis e crots che a saltavin ta la aghe"

gjavât fûr di "Come tai romançs" di Alan Brusini

"[i fruts] saltavin dentri ta la aghe a «marinare», zigant; a jessevin là di là scjassant il cjâf, si suiavin la muse tes mans"

gjavât fûr di "La aghe da pît la cleve" di Dino Virgili

saltâ v.intr.
(sal-tâ)

Movisi svelt, lâ une vore svelt

sinonims

butâsi

esemplis

"sant Pieri sbarlufît [par vie che al veve cjapât cuatri legnadis] al saltà di strade fûr dal fen [...] al corè jù in curtîl a cjapâ il batali e a scomençâ [a bati] la prime vie [di forment]"

gjavât fûr di "Il prin sarasin" di Catarine Percude

"i voi a saltavin mo su Berto e Nedo e mo sul pari"

gjavât fûr di "Trê feminis" di Gianni Gregoricchio

saltâ v.intr.
(sal-tâ)

Movisi a scjassadis, tremant

esemplis

"rivât dongje dai lavôrs, Ricardo al dismontà par lâ indenant a pît, cu la biciclete che i saltave sui claps"

gjavât fûr di "Prime di sere" di Carlo Sgorlon

saltâ v.intr.
(sal-tâ)

Dal cûr, tacâ bati a fuart cuasi che al volès jessî fûr (fig.)

sinonims

sbalçâ

esemplis

"a ogni cricâ di un stec pescjât, a ogni svolt fra i ramaçs, a ogni bave di aiar che e ves businât tes pontis dai pins, il cûr i saltave in bocje e al tremave come une vuiscje"

gjavât fûr di "Tal bosc di Kebespok" di Pieri Menis

saltâ v.intr.
(sal-tâ)

Di alc, distacâsi di colp

sinonims

saltâ vie

esemplis

"la pression e à fat saltâ il stropul"

"la esplosion e à fat saltâ il cuviert dal fabricât de unitât 1"

gjavât fûr di "Il disastri de centrâl nucleâr di Fukushima Dai-ichi" di Alessandro Pascolini

saltâ v.intr.
(sal-tâ)

Sclopâ

sinonims

saltâ par aiar, tonâ, sclopâ

esemplis

" i partesans a vevin fat saltâ il dipuesit di benzine e copâts chei mucs"

gjavât fûr di "Il muc" di Roberto Ongaro

"a Pinçan a jerin juste rivâts a passâ il puint che i soldâts lu àn fat saltâ cun dut ce che al veve parsore: int cu la cosse, cjaruçs cjamâts di fruts e di viei, soldâts, vacjis, cjavai, ducj un salt tal Tiliment in plene"

gjavât fûr di "Amîs come prime" di Alan Brusini

saltâ v.intr.
(sal-tâ)

Soredut di mecanisim eletric, no funzionâ plui (fig.)

sinonims

lâ, lâ vie

esemplis

"il contat al fâs saltâ l'eletric, al sune l'alarme"

gjavât fûr di "Storie di Min" di Ivano Urli

"la int, usade a lavorâ cuant che al jere inmò scûr, no si faseve plui di tancj fastidis se une lampadine i saltave"

gjavât fûr di "Soreli jevât a mont" di Raffaele Serafini

saltâ v.intr.
(sal-tâ)

Vignî tant che istint, umôr, voie e v.i. (fig.)

sinonims

saltâ sù, vignî sù, saltâ la moscje, saltâ il gri

esemplis

"a fasevin finte di no viodilu di tant antipatic che al jere, e sporc e vilan. E ancje viliac, che se i saltave di barufâ, al si sielzeve une frute"

gjavât fûr di "Amîs come prime" di Alan Brusini

"di là a cualchi timp a sant Pieri i tornà a saltâ di lâ a spas, ma cheste volte si tirà invezit tal paîs dai Malcontents"

gjavât fûr di "Contents e malcontents" di Catarine Percude

saltâ v.intr.
(sal-tâ)

Di cdn., jessi destituît (fig.)

sinonims

colâ

esemplis

"cul Comissari De Gregoris o jeri rivât ancje a concludi, ma chel lu àn fat saltâ, parcè che al jere masse vecjo"

gjavât fûr di "Int di masnade" di Alviero Negro

saltâ v.intr.
(sal-tâ)

Di program, progjet e v.i., finî tal nuie, jessi sospindût o scancelât (fig.)

sinonims

lâ sù pal stec, lâ strucj

esemplis

"no savìn se il progjet dal autodrom bordanês al sedi saltât propit in gracie de oposizion de popolazion e dai siei rapresentants politics, o se a sedin stadis altris lis resons"

gjavât fûr di "Paveis al puest des machinis" di Linda Picco

saltâ v.intr.
(sal-tâ)

Intun resonament, intun discors, intune leture e v.i., passâ di colp di un pont a di un altri (fig.)

sinonims

passâ, lâ

esemplis

"al è impussibil fâ culì une ispezion dai centenârs di pagjinis de vore di Citolini; e sarès, come che al dîs il cont Collaltino, une «lungje navigazion» che nus stracarès nô come i siei amîs; e alore saltìn subite al setim dì, al colp di sene finâl"

gjavât fûr di "Il brevet" di Mario Turello

saltâ v.intr.
(sal-tâ)

Fâ un moviment di une o di plui posizions intun ordin

sinonims

lâ, movisi

esemplis

"il cjaval [dai scacs] al salte simpri di une casele nere a une blancje o di une blancje a une nere"

gjavât fûr di "Zuìn di scacs" di Nilde Teresa Negro

saltâ v.intr.
(sal-tâ)

[TS] (zûcs) Tai zûcs di azart, dal banc, pierdi dute la sume che si à a disposizion

saltâ v.tr.
(sal-tâ)

Passâ cuntun salt

esemplis

"Febo al coreve come un mat intes braidis, saltant i riui come un zupet"

gjavât fûr di "Domenie di cjace" di Checo Tam

" se al scrupulave alc [...] se svuincave pai curtîi, saltant i mûrs di confin [par no sei cjapât dai todescs]"

gjavât fûr di "La Madone de Pâs" di Maria Forte

saltâ v.tr.
(sal-tâ)

Lassâ di bande, volint o cence volê (fig.)

esemplis

"il CJS al svilupe contats direts cui grops di produtôrs dal Sud, saltant i mecanisims ordenaris de intermediazion"

gjavât fûr di "Guide par un consum just e solidâl" di Buteghe dal Mont, Luche Nazzi

"tai siei zîrs ator pai paîs, nol saltave mai Bertiûl, là che al jere bon vin e che al veve tantis cognossincis"

gjavât fûr di "Pre Pitin" di Antoni Beline

""[...] Contimi dut, cence saltâ nancje une virgule""

gjavât fûr di "Ombris tal infinît" di Carlo Sgorlon

monolengâl