SuperDizionari

monolingue

santul s.m.
(san-tul)

Cui che al ten a batisim un frut e che cussì al devente responsabil de sô educazion cristiane o che si cjape sù l'impegn di cjapâ il puest dai gjenitôrs se a vessin di mancjâ; come cui nons di parintât se si dopre cuntun possessîf nol è l'articul definît

esempi

"Lene e veve za preparâts i vistiduts, un scansel di armâr plen, robe di lane e di tele, golfuts, scufutis… insieme a vevin sielt il non, cirûts i santui, stabilît cui clamâ a gustâ pal dì dal batisim"

da "Sul agâr" di Pieri Menis

"Sandrin tal braç di sô mari al cjalave so santul che al fevelave svelt e sotvôs e che ogni tant al voltave il cjâf mo di ca mo di là par viodi se al rivave cualchidun"

da "Nô, soltâts..." di Lelo Cjanton

santul s.m.
(san-tul)

Cui che al jude a nassi une iniziative, une ativitât e v.i. (fig.)

esempi

"dal 1949 [Josef Marchet] al fâs di santul al moviment leterari “Risultive”"

da "Josef Marchet" di Redazion La Patrie dal Friûl

santul s.m.
(san-tul)

Persone autorevule o potente che e pues protezi o judâ (fig.)

esempi

"dut al dipent di alçâ une vore la vôs, magari fasint nassi cualchi disordin, o di vê un bon santul a Rome che al sepi mostrâ lis robis de bande juste"

da "Di vicin e di lontan" di Josef Marchet

" al à di vê cualchi santul di chei grancj che al lavore parsot"

da "L'avocat e la luianie" di Pieri Somede dai Marcs

proverbi

"cui che al à santui al à colaçs"

"cui che al à santui al à confets"

"daspò dal batisim, ducj a volaressin sei santui"

Torna in Cima