SuperDizionari

scjassâ v.tr.
(scja-ssâ)

Movi cun fuarce o sveltece, ancje plui voltis

sinonimi

sacodâ, spacâ, remenâ, sdrondenâ

esempi

""[...] Guri, sintistu?" lu scjassà pal braç"

da "La aghe da pît la cleve" di Dino Virgili

"il 6 di Mai dal '76, a lis 9 e minûts sot sere, un taramot trement al à scjassât il Friûl massime su la prime linie des monts"

da "Cuintristorie dal Friûl dal 1866 fint in dì di vuê" di Francesc Placerean

"un scriç al scjassave la code su la rame plui basse di un pin"

da "Tal ospedâl" di Amedeo Giacomini

scjassâ v.tr.
(scja-ssâ)

Colpî cun violence la emotivitât di cdn., fâ impression, pôre e v.i. (fig.)

sinonimi

conturbâ, impressionâ, sbarlufî, sconciertâ, sconvolzi, scossâ

esempi

"une scjarie di colps che si pierdè tal aiar… Come un rivoc cence fin che ducj a jerin usâts a sintî. Che nol scjassave plui nissun,… in chê lûs fusilade a buinore"

da "Cjase di Dalban" di Maria Forte

scjassâ v.tr.
(scja-ssâ)

Movi, dâ un stimul, che al pues jessi ancje negatîf o traumatic, massime cu la finalitât, l'efiet o la pussibilitât di cambiâ une situazion (fig.)

sinonimi

dâ une scjassade, dâ une sdrondenade, dâ une spacade

esempi

"lis tensions che a vevin scjassât il grup fondadôr a jerin personâls e politichis"

da "Un Friûl difarent: i 90 mhz di Onde Furlane" di Max Mauro

"vie pal secul XVI la Europe e je scjassade di cetantis rivoltis popolârs"

da "Il Friûl de Joibe Grasse dal 1511" di Carli Pup

"se un scandul al scjasse un partît, pronts a zurâ che ducj i partîts a son scandalôs"

da "Filosofie padronâl" di Riedo Pup

scjassâ v.tr.
(scja-ssâ)

Fâ vignî fûr dal sium o ancje di un straviament, di un pinsîr e v.i.

sinonimi

dismovi

esempi

"jê e veve començât a pisulâ su la taule. Ma i pugns e i sberlons dai zuiadôrs le scjassavin"

da "Amîs come prime" di Alan Brusini

scjassâ v.intr.
(scja-ssâ)

Movisi cun fuarce, ancje cun moviments ripetûts

sinonimi

scjassâsi, spacâsi, sacodâsi, tremâ, sdrondenâsi, sdrondenâ

esempi

"a pene che al è lât a mont il soreli, ve la tiere che e scjasse, ve il cîl che al tarlupe; la buere si scjadene e tu sintis il berli dal montafin"

da "Il Lâc di Cjavaç" di Josef Cjargnel

"un tren che de Ucraine in Gjermanie al sdrondene, al scjasse, mo al cor cul so bot cuant che al dîs di cori, mo si ferme par oris e oris se al dîs di fermâsi"

da "Storie di Vera" di Ivano Urli

monolingue