SuperDizionari

sclet adi., s.m.

Che, cui che nol dîs bausiis, che nol plate intenzions sintiments, che si mostre par ce che al è, che al acete e al mostre la veretât e v.i

sinonimi

franc, onest, sincîr, spontani, viert, clâr

esempi

""Scusait se o soi sclete, ma bisugne che us disi dut ce che o pensi, aromai""

da "Prime di sere" di Carlo Sgorlon

"a cjalâ cuntun voli sclet e net si inacuarzisi che cuant che a fevelin di comunitât locâl, no san ben di ce che a vuelin fevelâ"

da "Pe unitât di glesie in Friûl" di Francesc Placerean

"a mi, mi plasin lis cjossis scletis, che a si puedin cognossi pene si lis viôt"

da "Vieri e gnûf" di Pieri Piçul

sclet adi.

Sempliç, cence masse elaborazions, ornaments e sim.

sinonimi

cast, sempliç, a la buine

esempi

"un vistît sclet, cui colôrs suturnôs de puare nuvice che e jere stade"

da "La tiere di Lansing" di Maria Forte

"i gustâs a jerin sclets ma boins che Mirco si lecave i dêts"

da "Par stradis lungjis" di Alan Brusini

"a nassevin, si maridavin, a murivin tal lavôr, jenfri lis lôr fiestis scletis, tes lôr piçulis ligriis e grancj dolôrs"

da "La aghe da pît la cleve" di Dino Virgili

sclet adi.

Che nol è stât messedât o mudât, che al à lis sôs cualitâts origjinâls o che nol à nuie altre dongje o in plui

sinonimi

pûr, rût

esempi

"al bêf un cafè sclet"

da "Pronostic del 1828" di Pieri Çorut

"o vin mangjât une mignestrine di fidelins, mieze ale di poleç, un panetin fof, che culì a clamin montassù, ma bevude aghe sclete"

da "Viaç a Vignesie" di Arturo Feruglio

"voi che a passavin in cuatri e cuatri vot de ligrie plui sclete a la fumate plui penze"

da "Pre Pitin" di Antoni Beline

sclet adi.

Di azion, moviment e sim., svelt, fuart, sigûr

sinonimi

franc, svelt, sfrancjât

esempi

"o viodevi Martin che al cjaminave daûr di me cul so pas sigûr e sclet di montagnâr"

da "Il dolfin" di Carlo Sgorlon

sclet av.

In mût naturâl, spontani, cence dî bausiis e cence platâ nuie

sinonimi

clâr

esempi

"o vin simpri fevelât clâr e sclet, o vin cirût di smascarâ lis manovris pôc netis"

da "Esam di cussience" di Josef Marchet

sclet av.

Cun comoditât, facilitât, sveltece

esempi

"anzi, che par podê cjaminâ sclet, / jo foi vignût vistût cul urmisin"

da "I, 42" di Ermes di Colorêt

monolingue