SuperDizionari

monolingue

scuele s.f.
(scue-le)

Organizazion educative publiche o privade, par slargjâ la istruzion, la culture, la preparazion professionâl cul insegnament coletîf e metodic

esempi

"la scuele e à l'oblic di aplicâ la leç statâl n. 482/99 [...] e à dentri bielzà lis regulis che a rivuardin l'ûs dal furlan a scuele tant che ogjet (materie) e tant che imprest di insegnament"

da "I dîs agns de leç n. 482/99" di Silvana Fachin Schiavi

scuele s.f.
(scue-le)

Organizazion che si cjape sù l'assum di insegnâ une ativitât specifiche

esempi

"o tornavi cjase aes cinc di sere, par po tornâ di gnûf a Sant Denêl, pe scuele serâl di dissen"

da "Interviste a Manlio Collavino" di Christian Romanin

"o frecuentavin la scuele di teatri dal Css e tra lis ativitâts e jere chê de publicitât teatrâl"

da "Un Friûl difarent: i 90 mhz di Onde Furlane" di Max Mauro

scuele s.f.
(scue-le)

Ancje tal pl., ativitât o complès di ativitâts di insegnament e di aprendiment

esempi

"finît l'an di scuele, mi veve passât ae seconde classe, e cussì l'an dopo mi soi presentât al mestri Bastian"

da "A scuele" di Pieri Menis

"chel daspomisdì, l'ultin prime che e tornàs a tacâ scuele, [...] a vevin sielzût il motîf de fieste grande di fin Istât"

da "Fieste grande di fin Istât" di Gianfranco Pellegrini

"chel frut li, vuarfin di pari, al veve començadis lis scuelis cun Mirco"

da "Par stradis lungjis" di Alan Brusini

scuele s.f.
(scue-le)

Il complès di chei che a van daûr des stessis ideis filosofichis, artistichis, sientifichis e v.i. o che a àn imparât di un stes mestri o che a colaborin cun lui e v.i.

esempi

"la Scuele di Milet e scomençà une tradizion che no sarès mai plui cessade. E butà lis fondis des costruzions razionâls esplicativis dal sisteme dal mont"

da "Viaç aes origjins dal Logos" di Adrian Cescje

"[Domeni di Tumieç] al è il plui autorevul e cualificât tra i intaiadôrs de cussì clamade scuele tumiezine"

da "Storie de art in Friûl" di Bepi Agostinis

"[Achil Telin al jere] un dai protagoniscj duncje de “scuele gjeografiche furlane”, par dîle cun Francesco Micelli, che e viôt tant che personaç clâf la figure di Giovanni Marinelli"

da "Il lunari mai jessût - Tellini te prime vuere mondiâl" di Donato Toffoli

scuele s.f.
(scue-le)

Esperience che e insegne alc di impuartant (fig.)

esempi

"la autonomie e je la uniche scuele di moralitât politiche, di onestât civiche, di cussience publiche pussibile in Italie"

da "Autonomie e moralitât" di Josef Marchet

scuele s.f.
(scue-le)

Abilitât, capacitât o inteligjence, ancje maliziose

esempi

"Mamì, cuntun imprest a ponte, lu tuchignave [il mangjâ] cun scuele, viodint che ogni part a cuistàs il just colour"

da "Kebar krossè" di Stiefin Morat

"Guido al tornà cu la scuse di viodi se Jacum, il so amì, al veve scrit, ma no coventave scuele par capî che no jerin lis letaris di Jacum che i interessavin, si ben Cechine"

da "Cretevierte" di Roberto Ongaro

scuele s.f.
(scue-le)

[FÛ] Comunitât di personis che a fasin un stes mistîr, associadis di regulis di solidarietât e dispès di devozion a un sant protetôr

sinonimi

fradaie, fraterne, confraternite

proverbi

"cuant che il to mus al nasseve, il gno al leve a scuele"

"cui che al vûl un bricon che lu mandi a scuele o ben a passon"

"la esperience e je une grande scuele"

"la miserie e je une grant scuele"

"lis disgraciis a son une triste scuele"

"se si à voie di vê un bon poltron, bisugne mandâlu a scuele o a passon"

Torna in Cima