SuperDizionari

sogjet s.m.
(so-gjet)

Argoment, cuistion di une discussion, conversazion, riflession e v.i. o teme di une vore artistiche o leterarie

sinonims

argoment, teme

esemplis

"ogni sogjet che e piturave al veve alc di primitîf e di ancestrâl"

gjavât fûr di "Ombris tal infinît" di Carlo Sgorlon

"l'artist che al sint la art, al adore ancje il sogjet che lu ispire"

gjavât fûr di "Co l'amôr al cimie" di Costantino Smaniotto

"tal 1890-92 [...] e je stade fate une recite te Cjase di ricovar di vie Praclûs, cuntun teatrin improvisât [...]. Sogjet de presentazion e je une classiche aventure di Arlechin"

gjavât fûr di "Storie e cronistorie dal teatri in Friûl" di Bepi Agostinis

Viôt ancje: subiet

sogjet s.m.
(so-gjet)

Individui o complès di individuis o ancje istituzion che a fasin une cierte azion

esemplis

"ancje su chest fat la Assemblee de comunitât linguistiche furlane e à fat sintî la sô vôs, dongje di altris sogjets istituzionâi, politics e de societât civîl"

gjavât fûr di "Rai e furlan: la Italie e je «una e incorreggibile»" di Marc Stolf

sogjet s.m.
(so-gjet)

Spec. spres., individui che al da suspiet, antipatie, maravee

sinonims

element, persone, scampul, figure, personaç

esemplis

"al jere il viceprefet, un om di chei de tiere balarine e, par noaltris furlans, un sogjet pôc gustôs dal sigûr cun chê muse di comant e di pôc di bon"

gjavât fûr di "Lis votazions" di Pieri Somede dai Marcs

"la strade de sede mazziniane e jere deserte, fûr che par un pâr di sogjets che a levin sù e jù e a savevin tant di polizie politiche"

gjavât fûr di "Memoriis di politiche linguistiche" di Adrian Cescje

sogjet s.m.
(so-gjet)

[TS] (med.) Pazient, individui in cure o sot indagjin cliniche

esemplis

"si à viodût che se un sogjet bilengâl al veve une lesion intal emisferi di çampe e al deventave afasic, nol jere dit che al ves i stes problemis in dutis dôs lis lenghis"

gjavât fûr di "Neuroimagjins funzionâls e cerviel bilengâl" di Daniela Perani

"a àn esaminâts e metûts in prove centenârs di sogjets [cjans rabiôs], e a son rivâts adore a cjatâ la lidrîs de rabie"

gjavât fûr di "Il compromesso" di Riedo Pup

sogjet adi., s.m.
(so-gjet)

Che, cui che al sta sot dal domini, de autoritât o dai efiets di cdn. o di alc

esemplis

"[lis comunitâts dal Friûl] a aministravin la justizie sui lôr sogjets"

gjavât fûr di "Cuintristorie dal Friûl fin sot la Italie" di Josef Marchet

"che al viodi mo, par dîle francje, jo o soi stade avonde sogjete a miei fradis"

gjavât fûr di "Butìnle in staiare" di Pieri Somede dai Marcs

"pal pinsîr moderni invezit ogni classificazion e je sogjete ad arbitrarietât, a relativisim culturâl,"

gjavât fûr di "Il brevet" di Mario Turello

monolengâl