SuperDizionari

supâ v.tr.
(su-pâ)

Tirâ sù un licuit cu la bocje, o, tal câs di cualchi animâl, ancje cun altrsi aparâts

sinonims

cjucjâ, tirâ sù, çupâ

esemplis

"alì e cerce e e cjucje par ordin, supant pacjifiche intal pignat dal lat cu la canucje in bocje"

gjavât fûr di "Storie di Vera" di Ivano Urli

"al jere pecjât che [i pierçui] a colassin tant che a colavin dai pierçolârs cjamâts, o che a lassin lis âfs a supâju"

gjavât fûr di "Pierçui" di Meni Ucel

"dâi il lat al vidielut che lu supave sù dal podin"

gjavât fûr di "Cjase di Dalban" di Maria Forte

supâ v.tr.
(su-pâ)

Tirâ sù cu la bocje ancje alc che nol è licuit

esemplis

"supâ la ciche dal toscan"

gjavât fûr di "Viaç a Vignesie" di Arturo Feruglio

supâ v.tr.
(su-pâ)

Fâ altre stimolazion orâl par dâ plasê sessuâl

esemplis

"il me destin al è chel di supâ bigui a ducju i pervertîts disdenteâts che a àn cuatri francs di spindi"

gjavât fûr di "Donald dal Tiliment" di Stiefin Morat

supâ v.tr.
(su-pâ)

Cjapâ dentri, assorbî un licuit o une sostance o ancje alc di imateriâl (ancje fig.)

sinonims

tirâ sù, cjapâ sù, cjapâ, tignî, bevi

esemplis

"[l'arbul] al veve cjapât ben. Al supave tal teren coltât e al pareve bon"

gjavât fûr di "Il tei" di Maria Forte

supâ v.tr.
(su-pâ)

Cjapâ tal profont de ment, dal caratar e sim. (fig.)

esemplis

""Isal, par câs, ancje lui di chei che a àn supât lis ideis che a vegnin di France...""

gjavât fûr di "Int di masnade" di Alviero Negro

"i zovins, magari cussì no, a àn supât la gnove culture"

gjavât fûr di "Ocjo di no pintîsi" di Riedo Pup

"jê e supave ogni mê peraule"

gjavât fûr di "Il dolfin" di Carlo Sgorlon

supâ v.tr.
(su-pâ)

Cjapâ alc cun intensitât, fâ che alc al sedi impleât, che al finissi (fig.)

sinonims

bevi, mangjâ, brusâ

esemplis

"chel fi che i veve supât dutis lis sôs fuarcis par tancj agns"

gjavât fûr di "Il muc" di Roberto Ongaro

"il secont frut, che al veve un cjâf che si cueieve intun bol e che al mertave di lâ a scuele, al veve supât in pôcs agns i misars sparagns da la famee"

gjavât fûr di "Aiar di cjase" di Franca Mainardis

"al pareve che la cjase e supàs il materiâl, tant al sparive dut tun bot"

gjavât fûr di "Il mâl dal mûr" di Lucio Perès

supâ v.tr.
(su-pâ)

Vê di sopuartâ alc di negatîf (fig.)

sinonims

patî, subî, paidî, gloti, sopuartâ

esemplis

"i furlans e àn vude la disgracie di scugnî supâ, dopo dal 1420 fint in dì di vuê, un paron daur l'altri"

gjavât fûr di "Cuintristorie dal Friûl dal 1866 fint in dì di vuê" di Francesc Placerean

monolengâl