SuperDizionari

tignude s.f.
(ti-gnu-de)

Cuantitât di elements, di materiâl e v.i. che e pues stâ intun spazi, intun contignidôr, intune struture e v.i.

sinonims

puartade, capacitât, tignince

esemplis

"la domande turistiche e je impoçade e cui che al aumente la tignude des stazions al causione dome la riduzion dai vuadagns"

gjavât fûr di "Implants plui capients, vuadagns plui bas" di Luche Nazzi

tignude s.f.
(ti-gnu-de)

Proprietât di une sieradure o di un recipient di no lassâ passâ o lâ fûr licuits o gas

esemplis

"il contadin al pues polsâ, ancje se tai ultins dîs di Avost al pronte semplis, sintinis e cuinçs par jemplâju di aghe (une volte a vignivin sistemâts dilunc roiis e riui) par slargjâ lis dovis e cussì tornâ a dâur la lôr tignude"

gjavât fûr di "Il grant lunari dal Friûl" di Mario Martinis

tignude s.f.
(ti-gnu-de)

Capacitât di tignî dûr, di resisti ai efiets di alc o di no molâ in situazions contrariis

sinonims

indurance, resistence, tignince

esemplis

"ogni partît (si visaiso? ) si svante, ogni volte, di vê vinçût lis elezions o, di mâl che e vadi, di vê mostrât une buine tignude"

gjavât fûr di "Sot vie o injenfri" di Riedo Pup

tignude s.f.
(ti-gnu-de)

Mût di vistîsi, speciâl par une cierte ocasion o par une cierte ativitât

esemplis

"i pulizais e i garbenîrs, in tignude antisomosse, parâts cun scûts e cascs, a àn rispuindût cun manganeladis e pocadis"

gjavât fûr di "Om, nature e “grandis infrastruturis”" di Angela Lano, Paola Rando, Roberto Topino, Rem Spicemei

tignude s.f.
(ti-gnu-de)

Grande proprietât di tiere, in câs ancje cun cjasis o altris costruzions e implants

esemplis

"par sierâ ator ator cuntun mûr la sô tignude, al veve fat butâ fûr il Crist che al jere sul cjanton"

gjavât fûr di "La int" di Pieri Menis

"une dì di Vendemis al jere lât in caroce e doi cjavai pomâts cun sô mari la contesse Boreate, te tignude di Barbian a Fraelà"

gjavât fûr di "Come tai romançs" di Alan Brusini

monolengâl