SuperDizionari

tirâ dilunc loc.v.

Lâ indenant, movisi indenant, soredut cence fermâsi

sinonimi

lâ indenant, lâ indevant, lâ vie dret, lâ dret, lâ dilunc, tirâ indenant

esempi

"il Signôr, cence badâi [a sant Pieri], al tirà dilunc e al jentrà intune altre cjase plui puare, nere di cjalin"

da "La ospitalitât" di Luigi Gortani

tirâ dilunc loc.v.

Lâ indenant a jessi o a compuartâsi intune cierte maniere o a fâ alc

sinonimi

lâ indenant, lâ indevant, lâ vie dret, lâ dret, lâ dilunc, tirâ indenant

esempi

"il patrimoni culturâl di cheste regjon sul confin, spetacolâr te sô pluritât di formis artistichis, di sfumaduris dialetâls, di contaminazions forestis, di popui e di tradizions, al tire dilunc e si transforme"

da "La tô place: cjanton di mont" di Valentina Urli

tirâ dilunc loc.v.

Lâ indenant cuntun discors, cuntun argoment

sinonimi

lâ indenant, lâ indevant, parâ indenant, parâ indevant

esempi

""No viodial in ce cundizion che al è ridot? Al à il fisic di un di sessante agns!" [...] "Ce puedial fâmi un spagnolet?". "Che al fumi, che al fumi, al viodarà ben!" E comentà la muinie tirant dilunc, po: "Che al torni te sô stanzie cumò, che ca di un pôc e rive la cene""

da "Tal ospedâl" di Amedeo Giacomini

tirâ dilunc loc.v.

Vê une cierte durade

sinonimi

lâ indenant, lâ indevant, lâ dilunc, lâ a dilunc, tirâ a dilunc, tirâ a lunc

tirâ dilunc loc.v.

Vivi, sostentâsi, lavorâ e v.i., intune cierte maniere che e pues jessi specificade o soredut a la mancul piês (coloc.)

sinonimi

tirâ indevant, lâ indevant, lâ indenant, tirâ indenant

esempi

"cussì, cence vê un fin, al tirave dilunc sbarcjant lunari e cuant che no jerin plui napis di spacâ, nissun i dineave une bocjade di companadi e une fete di polente"

da "Spacecjamin" di Pieri Somede dai Marcs

"o pensi a mê mari e a gno pari che, par tirâ dilunc, a àn di scanâsi dut il dì"

da "Sul florî" di AAVV

tirâ dilunc loc.v.

Fâ spietâ tant o fâ ritardâ

sinonimi

tirâ in lunc, tirâ a lunc

esempi

"par gjavâ di mieç il probleme [di cjatâ la cuviertidure finanziarie pe leç], si tire dilunc ancje la aprovazion dai regolaments"

da "Comedie continue" di Oscar Puntel

monolingue