SuperDizionari

tradî v.tr.
(tra-dî)

Fâ alc cun intenzion cuintri dai leams di fiducie e di comunance che si à cun cdn., o cuntune comunitât o cuntune istituzion, (ancje ass.)

sinonims

ingjanâ, rineâ

esemplis

"a Rome a vevin decidût che chei là sù a jerin il Nemì e che bisugnave tradî la Austrie-Ongjarie, prime di chê volte aleade, par fâ tornâ tal grim de Italie Trent e Triest"

gjavât fûr di "Just, cence di" di Checo Tam

"vô no vês di tradî come chei altris… No vês di tradî la bandiere e di bandonâ i amîs…"

gjavât fûr di "Cjase di Dalban" di Maria Forte

"dismenteâ al è come un tradî, e tradî no si po… Si puedial tradî il pari? Si puedial tradî il sanc che al sbat tai timplis e tes conolis e dentri des cuestis? No si po tradî!"

gjavât fûr di "La aghe da pît la cleve" di Dino Virgili

tradî v.tr.
(tra-dî)

Mancjâ di fedeltât sessuâl o sentimentâl tai confronts dal compagn o de compagne

sinonims

fâ i cuars

esemplis

"i àn scrit une letare anonime disint che jê lu tradive e che faseve l'amôr cun Meni"

gjavât fûr di "Vilie di Nadâl" di Pieri Somede dai Marcs

tradî v.tr.
(tra-dî)

Stracapî o fâ stracapî, ancje in mût intenzionâl

esemplis

"tradî il sens di un discors"

tradî v.tr.
(tra-dî)

No rispietâ, no sodisfâ, no meti in vore ce che altris si saressin spietâts o ce che al pues jessi un pont di riferiment

sinonims

deludi, sporcjâ

esemplis

"la eterne storie dai zovins che, tradint la politiche dai vecjos, a drecin la fortune de famee"

gjavât fûr di "Come tai romançs" di Alan Brusini

"ma sì, la vite no po simpri tradî"

gjavât fûr di "Trê feminis" di Gianni Gregoricchio

"nol acete il so sisteme, no parcè che al vedi tradît i criteris gjenerâi, ma parcè che nol à acetadis chês o chês altris soluzions particolârs"

gjavât fûr di "Memoriis di politiche linguistiche" di Adrian Cescje

tradî v.tr.
(tra-dî)

Fâ sbaliâ une valutazion, une prevision (coloc.)

sinonims

ingjanâ, imbroiâ

esemplis

"la presunzion mi veve tradît, svuarbât"

gjavât fûr di "I forescj" di Alan Brusini, Gian Paolo Linda

"se la memorie no nus tradìs, par esempli, in Sardegne “Sa die de sa Sardigna” e ven memoreade propit daûr di une leç regjonâl"

gjavât fûr di "La Patrie, la Fieste e la propueste di leç regjonâl" di Marc Stolf

tradî v.tr.
(tra-dî)

Jessi la prove di alc che nol è o nol jere evident (fig.)

esemplis

"[l'ispetôr] segnant cul dêt une clâf che al tignive ta chê altre man, i disè cun vôs dure: "Viodêso, Nart, che la clâf us à tradît?""

gjavât fûr di "Cretevierte" di Roberto Ongaro

monolengâl