SuperDizionari

valôr s.m.
(va-lôr)

Ecuivalent in bêçs di un ben

esempi

"il vescul Paulin di Aquilee al si ritirà a Grau cun dut ce che al veve di plui valôr"

da "Cuintristorie dal Friûl fin sot la Italie" di Josef Marchet

"il turisim internazionâl al contribuìs cun cuasi il 30% al valôr des esportazions dai servizis mondiâi"

da "Il rûl economic dal turisim in Italie" di Attilio Celant

valôr s.m.
(va-lôr)

[TS] (econ.) Carateristiche di un ben che e fâs che si puedi cambiâlu cuntune cierte cuantitât di altris bens o pûr che al puedi sei util tal sodisfâ ciertis bisugnis

esempi

"i bens che a son vendûts e comprâts sul marcjât a puedin jessi valutâts tal lôr valôr su la fonde di presits che a nassin di une negoziazion"

da "Dal Prodot Interni Lort aes misuris dal benstâ" di Marzi Strassolt

valôr s.m.
(va-lôr)

[TS] (econ.) Dut ce che si pues comprâ e vendi, p.e. monedis forestis, azions, obligazions e v.i.

esempi

"vie dilunc dal ultin cuart di secul dal Votcent, a sucedin bruts fats inte economie mondiâl. Tal 1873 e va jù la Borse dai valôrs di Viene"

da "Il Risorziment a Martignà" di Elio Varutti

valôr s.m.
(va-lôr)

Tal pl., robe preziose

sinonimi

preziôs, zoie

esempi

"la casse di nuvice adulà che a jerin i valôrs"

da "Amîs come prime" di Alan Brusini

valôr s.m.
(va-lôr)

Complès di cualitâts personâls

esempi

"«Se le à cjolte Mirco» a disevin, «al vûl dî che e à il so valôr»"

da "Par stradis lungjis" di Alan Brusini

valôr s.m.
(va-lôr)

Domini de pôre o mancjance di pôre tal frontâ i pericui

sinonimi

baldance, eroisim, fiât, olse

esempi

"cualchidun lu clamave un «eroi» pal valôr e pal coragjo che al veve vût plui di une volte"

da "Sul agâr" di Pieri Menis

"i soldâts lu àn fat saltâ [il puint] cun dut ce che al veve parsore: int cu la cosse, cjaruçs cjamâts di fruts e di viei [...]. Cui che al fevele di valôr militâr e di patrie, prime al à di fâ i conts cun chestis robis"

da "Amîs come prime" di Alan Brusini

valôr s.m.
(va-lôr)

Complès di dotis morâls e inteletuâls che a fasin di riferiment tal compuartâsi, tal vivi, tal judicâ

sinonimi

principi

esempi

"il nestri mût di vivi, di lavorâ e di pensâ: cualitâts e difiets, virtûts e vizis, valôrs e sperancis"

da "Fûr che al vegni cui che al è stât" di Riedo Pup

"la onestât, la peraule e il lavôr fat ben a jerin valôrs fûr di discussion"

da "Il cjâf dai furlans" di Franc Fari

valôr s.m.
(va-lôr)

Capacitât professionâl di cdn. o cualitât di alc

sinonimi

braùre, capacitât, sgrimie, snait

esempi

"sienziâts dal valôr di Darwin, Mendel, Muller, Schröedinger"

da "Recension di La scienza non ha bisogno di Dio" di Lorenzo Marcolini

"une des plui bielis publicazions di grant valôr didatic"

da "Memoriis di politiche linguistiche" di Adrian Cescje

valôr s.m.
(va-lôr)

Impuartance di une cjosse, di une situazion, di une cundizion e v.i.

sinonimi

afâr, pês, puartade, significance

esempi

"l'interès dal mont universitari viers de emitente udinese al è conferme dal valôr che e veve cjapade la sô ativitât"

da "Un Friûl difarent: i 90 mhz di Onde Furlane" di Max Mauro

valôr s.m.
(va-lôr)

Capacitât, ancje legâl o impositive, di vê efiet

sinonimi

eficacie, validitât

esempi

"i ordins che a jerin partîts di chenti a vevin vût valôr par dute la Europe"

da "Un cidinôr todesc" di Agnul di Spere

"lis leçs [de Contee di Gurize e Gardiscje] a jerin in funzion dome dal teritori, ma a vevin valôr tant che chês statâls"

da "Autonomie tal Friûl austriac" di Ferruccio Tassin

valôr s.m.
(va-lôr)

Significât

sinonimi

significance, significât, sens

esempi

"te sô definizion di dialet [...] «nol è un valôr semantic univoc, ni a nivel di ûs comun, ni a nivel vocabolaristic, ni a nivel sientific»"

da "Minorancis linguistichis" di Marc Stolf

"il visc al à ancje altris valôrs simbolics parcè che no dome al reste vert su plantis che invezit a pierdin lis fueis ma ancje parcè che al vîf cence bisugne di tocjâ tiere"

da "Nadâl" di Sandri Carrozzo

valôr s.m.
(va-lôr)

Di segns, simbui e v.i., informazion che e ven comunicade

esempi

"o pensìn, par esempli, al x dal portughês, che al à valôrs diferents seont la storie de peraule dulà che si lu cjate"

da "La grafie furlane normalizade – Introduzion" di Xavier Lamuela

valôr s.m.
(va-lôr)

Nivel, cuantitât, intensitât e v.i. che si puedin misurâ

esempi

"Dogne, Resie e Scluse a mostrin valôrs di dispopolament dongje dal 70%"

da "La mont furlane" di Mauro Pascolini, Andrea Guaran

"doprant i modei [...] al è pussibil valutâ i impats di gnûfs implants industriâi [...] cussì come sudividi i valôrs dal incuinament tes diviersis tipologjiis di sorzints"

da "Modelistiche numeriche pe valutazion e gjestion de cualitât dal aiar" di Daniele Goi, Dario Giaiotti, Fulvio Stel

valôr s.m.
(va-lôr)

[TS] (fis.) Determinazion che une variabile e cjape sù

esempi

"la probabilitât par un dât valôr di A o u e risulte indipendente di ducj chei altris valôrs di A e a"

da "L'articul di Einstein dal 1905 sul efiet fotoeletric. Un lavôr plurilengâl voltât in lenghe furlane" di Lorenzo Marcolini

"Shannon al à definît la capacitât dal canâl come massim de informazion che o rivìn a ricevi, di un valôr de probabilitât di erôr p"

da "La societât de informazion: cirint lis origjins" di Valentino Castellani

monolingue