SuperDizionari

vignî fûr loc.v.

Vignî de bande esterne di alc di sierât o limitât o parât o definît

sinonims

jessî

esemplis

"il mulinâr juste in pont al vignive fûr de puarte par judâlu a scjariâ"

gjavât fûr di "Il matescul di Cjabie" di Luigi Gortani

"Bernart al veve viodût Laurinç che al vignive fûr di un bar"

gjavât fûr di "Frêt" di Agnul di Spere

"o jerin jo e Laura tal mâr ma aromai al jere tart, o vignìn fûr de aghe"

gjavât fûr di "Jo e Graziella" di Mario Beltramini

vignî fûr loc.v.

Jessî di une situazion dificile, pericolose o displasevule

sinonims

puartâle fûr, puartâse fûr, salvâsi, scjampâ, scjampâle, suiâsi, tirâse fûr

esemplis

"l'avocat lu sconzurave di stâ ben atent a ce che al diseve al judiç, par no vignî fûr di chê cause cence un carantan"

gjavât fûr di "Frêt" di Agnul di Spere

"fruts tirâts sù cussì a vivevin contents. A cressevin pronts a frontâ e a vignî fûr di ogni dificoltât"

gjavât fûr di "I furlans e i frutins" di Riedo Pup

vignî fûr loc.v.

Vê une forme, une disposizion, une direzion che a fasin une prominence rispiet a une linie o a une superficie

sinonims

dâ infûr, jessî

esemplis

"sul cjanton de casarme al vignive fûr il braç dal ferâl che, vie pe gnot, al iluminave la beorcje"

gjavât fûr di "La aghe da pît la cleve" di Dino Virgili

"si rivave suntun cuel vert che al vignive fûr dal Gam Spitz"

gjavât fûr di "Funerâl a Pâl Piçul" di Pieri Menis

vignî fûr loc.v.

Jessi pandût o cognossût

sinonims

saltâ fûr

esemplis

"e dome cumò il segret di agnorums al ven fûr tal soreli"

gjavât fûr di "La aghe da pît la cleve" di Dino Virgili

"e jere vignude fûr dute la veretât sul fat subit dopo; Mariute no voleve sposâ so cugnât vedul, ma done Pine la veve obleade cence remission"

gjavât fûr di "Chei di Muraie" di Pieri Menis

vignî fûr loc.v.

Jessi dit, jessi pronunziât

sinonims

saltâ fûr

esemplis

"ce sodisfazion che al veve gjoldude a scoltâ i “sì” che a jerin vignûts fûr di chês bocjis, magari framieç dai dincj"

gjavât fûr di "Îr e doman" di Gianni Gregoricchio

vignî fûr loc.v.

Jessi publicât, jessi dât fûr

sinonims

saltâ fûr, jessî

esemplis

"Toni Baldin al à olût fâ vignî fûr chest librut e nome a lui o devi ricognossince se vuê el mio non nol è dismenteât in Furlanie"

gjavât fûr di "El cercandul e altris fufignis" di Arturo Feruglio

"al jere un romanç che al fevelave dal Friûl, al jere vignût fûr di pôcs dîs"

gjavât fûr di "In viaç di domenie" di Agnul di Spere

vignî fûr loc.v.

Vê une origjin

sinonims

saltâ fûr, vignî

esemplis

"[la nuvice] ti puarte in dote un cûr / che l'è to par sigûr: / e ven fûr da un cjasât, / che par divise al à la fedeltât"

gjavât fûr di "La mode" di Pieri Çorut

"[la peraule taliane "pipistrello"] e ven fûr dal latin vespertilio"

gjavât fûr di "Peraulis in libertât: i atlants linguistics" di Giovanni Frau

vignî fûr loc.v.

Jessi il risultât o la consecuence di un resonament, di un procediment, di une dinamiche e v.i.

sinonims

risultâ, saltâ fûr

esemplis

"se no mi ven fûr un lavôr come cu va, mi pâr simpri di robâ la palanche al gno prossim"

gjavât fûr di "Lis predicjis dal muini" di Josef Marchet

"lis robis a vegnin fatis masse a la svelte e dopo al ven fûr ce che al ven fûr"

gjavât fûr di "L'avocat e la luianie" di Pieri Somede dai Marcs

vignî fûr loc.v.

Jessi gjavât a sorte o risultâ chel sielzût o chel che al vinç e v.i. in zûcs, lotariis, tombulis e v.i.

sinonims

saltâ fûr, vignî

esemplis

"te roulette, se al ven fûr il zero al vinç il banc"

vignî fûr loc.v.

Di cundizion fisiche, malatie e v.i., tacâ a vê efiet, vê une manifestazion

esemplis

""O sin za avonde mâl sistemadis; guai se nus vegnin fûr i bruscs!""

gjavât fûr di "La foghere" di Luciano Rocco

vignî fûr loc.v.

Fâsi notâ par cualchi cualitât, soredut positive, diferenziâsi e jessi miôr di altris

sinonims

spicâ, fâ spic

esemplis

"nus plasarès une vore judâ cui che al à talent e sostignî i artiscj de nestre zone, stant che nus samee simpri un fregul plui dificil vignî fûr cuant che si è a stâ fûr des grandis citâts"

gjavât fûr di "Elisa e à un progjet: judâ i zovins musiciscj de regjon" di Redazion Lenghe.net

"probabilmentri no je plui chê voie di vignî fûr , il spirt di sacrifici parcè che cumò a stan ducj ben e a cjapin la vite in maniere difarente"

gjavât fûr di "Interviste a Dino Zoff" di Christian Romanin

vignî fûr loc.v.

Dî o contâ alc, soredut alc di particolâr, o mostrâ une intenzion, un desideri, une pretese, une idee e v.i., soredut cuntune cierte sorprese o strambetât

sinonims

saltâ fûr

esemplis

"co verin finît di sbasofiâ l'è vignût fûr cuntune flabe, tant di distraiju, e lassâur la bocje di un altri savôr"

gjavât fûr di "Un gustâ diplomatic" di Giovanni Gortani

""Al mi ven fûr cun ciartis pretesis…""

gjavât fûr di "Mariute" di Ercole Carletti

"co e veve provât a dîur alc, la vevin fate tasê: "Cumò si use ducj cussì, no stâ vignî fûr cu lis tôs ideis medievâls!""

gjavât fûr di "Fûr di timp" di Jolanda Mazzon

monolengâl