SuperDizionari

Torna indietro

monolingue

vuarî v.tr.
(vua-rî)

Fâ in mût che cdn. che al jere malât al torni in salût

esempi

"i malâts a cirivin di lui che ju vuarive cu la recipe plui sclete "Aghe cjalde e ben cuvierts""

da "L'aventari pal barcon" di Maria Forte

"al saveve ancje lui che nol jere il câs di tentâ di vuarîlu [il purcit cul mâl rossin]"

da "A marcjât" di Meni Ucel

Vedi anche: guarî

vuarî v.tr.
(vua-rî)

Fâ sparî i efiets di une malatie, di une lesion, di une cundizion patologjiche

esempi

"chei rârs câs di epilessie dulà che lis medisinis no rivavin a vuarî la malatie"

da "Il cjâf dai furlans" di Franc Fari

vuarî v.tr.
(vua-rî)

Sfrancjâ di alc che al pues jessi calcolât un mâl o fâ sparî alc che al pues jessi calcolât un mâl (fig.)

esempi

"un dai pecjâts origjinâi de scuele taliane, che nissun nol rive o nol vûl vuarî e je la pache nazionalistiche"

da "Un popul e la sô scuele" di Antoni Beline

vuarî v.intr.
(vua-rî)

Tornâ a stâ ben dopo di jessi stât mâl

sinonimi

ripiâsi, rimetisi, dâ di ca

esempi

""[...] Cuant che la int us clamarà a visitâ cualchi malât, e vô mi viodarêso da pîts dal jet, chel malât vuarissarà sigura [...]""

da "Storia dai trê nerans" di Ranieri Mario Cossâr

"il nestri alpin al veve i pîts glaçâts e lis gjambis duris fin ai zenoi. In Italie al jere stât tant timp ator pai ospedâi, fin che al jere rivât a vuarî"

da "Zilugne" di Pieri Menis

vuarî v.intr.
(vua-rî)

Di une malatie, di une lesion, di une cundizion patologjiche, no vê plui efiet, no jessi plui

sinonimi

passâ, vuarîsi, cuarâsi

esempi

""Cui di voaltris rivaressial a cjapâse cun cualchidun altri se al ves intor une plaie che lu fâs cainâ? Ma come che la plaie e vuarìs , alore si sbroche cui interès!""

da "Microrivoluzions" di Stiefin Morat

vuarî v.intr.
(vua-rî)

Sfrancjâsi di alc che al pues jessi considerat un mâl (fig.)

esempi

"dut chest al è piês di une cjoche triste; parcè che di une cjoche di vin si torne di ca, de cjoche dal pan no si vuarìs"

da "Avostanis 2010: nuie di masse e tant di plui" di Walter Tomada

proverbi

"aghe, diete e serviziâl fâs vuarî di ogni mâl"

"amôr che al nas in malatie cuant che si vuarìs al passe vie"

"cui che al è mat nol vuarìs mai e se al vuarìs al è fortunât assai"

"dai colps si vuarìs di ducj, fûr che dal prin"

"dai poleçs si vuarìs cu la aghe dai ûfs di Pasche"

Torna in Cima