SuperDizionari

zirâ v.tr.
(zi-râ)

Fâ che alc o cdn. si movi cuntun moviment circolâr intor di un so as o di un ciert pont

esemplis

"uiuauiiiiiii uaiauauaiaiaia e fâs la radio cuant che Checut al zire la manopule"

gjavât fûr di "Beromünster e Monteceneri" di Checo Tam

"ogni sere so pari prin di lâ a durmî al zirave la clâf"

gjavât fûr di "Nadâl ancje par Gjelmin" di Pieri Menis

"zirant la manuele la pompe e sfuarçave la aghe a lâ sù"

gjavât fûr di "La invenzion dal vueit inte lampadine di Turo Malignani. Storie, gnovis ipotesis e atualitât" di Lorenzo Marcolini

zirâ v.tr.
(zi-râ)

Indreçâ di une cierte bande o de bande contrarie

esemplis

"la femine, viodintlu fer sul puint, lu cjalà a penis e lui al zirà il cjâf di une altre bande, tant che no le ves viodude"

gjavât fûr di "Cretevierte" di Roberto Ongaro

"un ritrat che, a cjalâlu, ti pareve che chel vecjo al jere vîf e che al podeve zirâ i voi viers di te"

gjavât fûr di "Faliscjis" di Cristina Noacco

zirâ v.tr.
(zi-râ)

Cjapâ o presentâ un argoment, un discors e v.i. intune cierte maniere (fig.)

sinonims

voltâ

esemplis

"zirile cemût che tu âs voie, ma a mi mi pâr che tu vedis dibisugne di rivalutâ la tô tassute di pirulis"

gjavât fûr di "Kebar krossè" di Stiefin Morat

zirâ v.tr.
(zi-râ)

Fâ lâ indevant intune cierte maniere (fig.)

esemplis

"al à zirât unmoncj di afârs"

gjavât fûr di "Il Nuovo Pirona" di Giulio Andrea Pirona, Ercole Carletti, Giovanni Battista Corgnali

zirâ v.tr.
(zi-râ)

Fâ fâ a cdn. chel che si vûl (fig.)

sinonims

voltâ

esemplis

"al è un pipinot, ducj lu zirin tant che a vuelin"

zirâ v.tr.
(zi-râ)

Lâ ator par un ciert puest, lâ di un puest a chel altri

sinonims

visitâ, viodi

esemplis

"là al varès ben burît fûr lui un professôr di Lussarie, sunadôr di violin, che nus varès fat zirâ Vignesie par ogni cjanton"

gjavât fûr di "Viaç a Vignesie" di Arturo Feruglio

"o pues dî di vê zirât il mont in vite mê!"

gjavât fûr di "Lis predicjis dal muini" di Josef Marchet

"Sant Martin, prime di deventâ sant, al si jere metût une volte a zirâ il Friûl"

gjavât fûr di "Sant Martin" di Luigi Gortani

zirâ v.tr.
(zi-râ)

Fâ vê a cdn. altri alc che si à vût (fig.)

sinonims

dâ, passâ

esemplis

"pre Checo al veve zirade la letare a pre Antoni Beline, che i rispuindeve cuntun document biel lunc"

gjavât fûr di "Memoriis di politiche linguistiche" di Adrian Cescje

zirâ v.tr.
(zi-râ)

[TS] (bancj.) Trasferî un assegn o une cambiâl firmantlis

sinonims

voltâ

esemplis

"zirâ un valie"

gjavât fûr di "Vocabolario friulano" di Jacopo Pirona

"zirâ un assegn"

zirâ v.tr.
(zi-râ)

[TS] (cinem.) Fâ lis ripresis di un film

esemplis

"tal 1963, Davide Maria Turoldo al zire il film “Gli ultimi”"

gjavât fûr di "Cuintristorie dal Nûfcent 1960-1970" di Angelo Floramo

zirâ v.intr.
(zi-râ)

Movisi sul propri as o ator di alc o cuntun moviment circolâr

esemplis

"sul fogolâr al zirave un spêt di dordeis o becanots"

gjavât fûr di "Come tai romançs" di Alan Brusini

"si monte, al sune il campanel, la gjostre e torne a zirâ"

gjavât fûr di "La cavalarice" di Pieri Somede dai Marcs

"e tirà la cjadenute e un sun al sclopà dentri sec, par disfantâsi vie sofegât tai mûrs, po la puarte e zirà"

gjavât fûr di "La tiere di Lansing" di Maria Forte

zirâ v.intr.
(zi-râ)

Cambiâ direzion

sinonims

butâ, dâ, deviâ, lâ, pleâ, sviâ, svoltâ, cjapâ

esemplis

"la strade e va da rive sù, o ziri a zampe pal troi jenfri i pins"

gjavât fûr di "I forescj" di Alan Brusini, Gian Paolo Linda

"a vivevin cence fâ trop sunsûr sul ôr dal borc fra la strade che e zirave cuintri il puint e la cune dal Ariul"

gjavât fûr di "La aghe dal Ariul" di Maria Forte

zirâ v.intr.
(zi-râ)

Lâ ator, ancje cence un puest precîs dulà rivâ

sinonims

lâ ator, lâ a torzeon, torzeonâ

esemplis

"la Miliute e zirave pe citât, cui voi viscâts des vetrinis"

gjavât fûr di "La tiere di Lansing" di Maria Forte

"a disin che di un pôc di timp incà al zire di gnot di chestis bandis un omenat dut peçotôs, cu la barbe lungje, che al cîr simpri di scuindisi"

gjavât fûr di "Resurezion a Pontinie" di Pieri Somede dai Marcs

"al zirà dut il dì sù pai boscs e pai cuei, vaìnt come un frut, devant de sô tiere e dal so cîl"

gjavât fûr di "La aghe da pît la cleve" di Dino Virgili

"voaltris o savês che fintremai che no sune une cjampane a buinore lis animis dai muarts a zirin te gnot"

gjavât fûr di "Gno nono" di Pieri Menis

zirâ v.intr.
(zi-râ)

Frecuentâ

sinonims

betâ

esemplis

"nol è un câs che li dentri [a Onde Furlane] a zirin musiciscj, pitôrs, atôrs e artiscj di ogni fate"

gjavât fûr di "Un Friûl difarent: i 90 mhz di Onde Furlane" di Max Mauro

"nol jentre mai tes ostariis, al zire nome pai cantinons, là che a vendin vins padronâi: par chel i disin Agnul Padronâl"

gjavât fûr di "Filosofie padronâl" di Riedo Pup

zirâ v.intr.
(zi-râ)

Vê difusion o circolazion

sinonims

lâ ator, cori

esemplis

"e zirave la cjacare che lis vevin viodudis [lis aganis] cun lôr a fâ fen in Cleve"

gjavât fûr di "La aghe da pît la cleve" di Dino Virgili

"e zirave une pueste di scuindon par mans dai corîrs partigjans de brigade Garibaldi"

gjavât fûr di "Storie di Min" di Ivano Urli

"a tachin a zirâ i finanziaments publics"

gjavât fûr di "L'Antifurlan" di Sandri Carrozzo

zirâ v.intr.
(zi-râ)

Funzionâ, soredut di machinis o mecanisims li che al è un moviment circolâr

sinonims

cori, lâ

esemplis

"intai prins dal Nûfcent Cortâl al veve cuatri mulins, ma cumò a zirin dome doi"

gjavât fûr di "Faliscjis" di Cristina Noacco

zirâ v.intr.
(zi-râ)

Dai bêçs, sei in circolazion

sinonims

cori

esemplis

"pai trafics dal popul e zirave invezit la lire austriache, clamade ancje lire venite, o lire milanese"

gjavât fûr di "Il Risorziment a Martignà" di Elio Varutti

monolengâl