Dal non di persone Agostin, che al ven dal latin Augustinus diminutîf di August (CI 30); achì si conserve la forme che e tire sul latin di divignince notarîl. Viodi Agosti e Agostini. Cheste forme diminutive si cjatave une vore in passât: Avustini de Glemona e Avostino tal 1350; Agustino de Mels tal 1317 (Avustinus de Mels tal 1320), Pieri nevot di Austin selar a Udin tal 1425 (Vicario, 2001 b), e v.i. Augustinum de Sancto Laurencio tal catapan di San Lurinç di Sedean (SL). In dì di vuê la difusion dal cognon e pâr jessi soredut cjargnele (Zui, Prât di Cjargne, For Davôtri, Tumieç…) e, in efiets, il non di persone Agostino al ven fûr une desene di voltis intes “Carte del Vicariato foraneo di Gorto in Carnia" publicadis di Gilberto dell’Oste tal 1999 (1420 Augustino quondam Vicoli de Plaza de Pesargis; 1450 heredes quondam Augustini de Mignulesco de Ovaro; e v.i.). Di un ramaç dai Agostini o de Augustinis di Ravasclêt, documentâts za tai prins dal Cinccent, a varessin di derivâ i Agostinis di Prât, Pradumbli e Davaste (A. Roia). Si cjate ancje a Tisane, Lignan, Palaçûl, Grau (di Prât di Cjargne tal Nûfcent). Tal Schedari Biasutti o cjatìn che i Agostini o Agostinis dal Cuatricent indenant a sono une vore a Fielis di Zui: tal 1487 Agostino di Giovanni Agostini compera prato in Zeglia di Fielis da Matteo Pauli. Stant ae stesse font, i Agostini dal Cuatricent indenant a son une vore ancje intai paîs jenfri S. Denêl e Sedean (1499 Rivaldo e Domenico q. Nicolò Augustini da Rivis al Tagliamento). Sul cont dai Agostinis di Culine di For Davôtri, Enrico Agostinis al scrîf te sô ricercje une vore valide (Agostinis, 2001): “Il cognon al è presint in maniere stabil a Culine di cirche 180 agns, al rive di For Davôtri e Frassenêt: la tradizion di famee – par altri in acuardi cun ce che o vin dit parsore – e loghe il so pont di origjin primari in Cjanâl, intindint il Cjanâl Pedarç (comun di Prât di Cjargne). La prime citazion in anagrafe e je dal 1801 (Apollonia di Agostino, muarte a sedis agns), ma al è une vore malsigûr il fat che in chei agns la famee e fos za residente a Culine. La regjistrazion anagrafiche e je in efiets plui vecje di vincj agns rispiet ae comparse stabile. Tor il 1820, cuasi tal stes moment, si insedin a Culine doi fradis che a fasin nassi doi ramaçs diferents de famee che a son presints inmò vuê, Fâri e Pirucélo, ducj i doi a Culine Piçule".