Dal non di persone medievâl Alfano. La ipotesi di une divignince gjermaniche di chest non e cjate conferme te atestazion di un langobart Alfanus tal an 799; la ipotesi alternative e je che, almancul te estremitât meridionâl de Italie e in Sicilie (là che al è plen di cognons gjermanics di divignince normane o langobardiche), Alfano al varès di peâsi, adun cun Alfarana e Alfieri, al arabic al-faras “il cjaval" o al-faris “il cavalîr" (Caracausi 1993, 34). In CI 45 si da la precedence ae ipotesi toponimiche: Alfano al è un comun in provincie di Salerno e une localitât in comun di Noto in provincie di Siracusa. Tal Schedari Corgnali: 1100 Alfano da Termoli, architetto. Cognon che si cjate soredut in Campanie e in Sicilie. Presint a Spilimberc.