Variantis dal non di persone Luîs. Chest nus rive de France, là che al jere deventât popolâr parcè che si clamarin cussì varis sovrans (scomençant di Luîs IX il Sant, muart tal 1270). Sul imprin il non al sunave *Hlouis, latinizât in Clovis e plui tart in Lodovicus; tor il Dusinte al mude in Louis, pronunziât Luís. Un altri sburt ae sô difusion in Italie al rive pal cult di Sant Luîs Gonzaga. Chest cognon al riprodûs la forme dai ambients eclesiastics Aloysius, deventade Alvìse a Vignesie e Luìse o Loìse inaltrò dal Nord Italie.
Tal 1274 Aloisio q. Reinoldo da Udine. Tal Schedari Corgnali: Alovisio (Gjenealogjie Colloredo); 1478 Alovixius de Rovereto.
Aloìsi al è un cognon avonde comun a Pai, frazion di Torri del Benaco in provincie di Verone (Rapelli, 1995), pal rest si cjate soredut tal Centri Sud de penisule taliane. Aloisio al è un cognon sicilian e dal Sud Italie (CI 52).
Dutis dôs lis formis a son presintis a Udin.
fonts
1274 Aloisio q. Reinoldo da Udine vende terra (Osp. 162, 188); 1406, ai 11 di Fevrâr Aloisio di Montegnacco Cancellerius (solo della Curia) (AB); 1594, ai 10 di Avrîl Giuseppe Aloisi di Gorizia accusato di eresia (ACAU – Inq. pr. 239); 1621, ai 27 di Zenâr nob. dott. Urbano Aloiseo abit. Udine – vertenza coi f.lli Misini di Pavia (Patriarcalis); 1648 Francesco Aloisio notaio da Bertiolo (ASU): chest, a Bertiûl, al è il prin di trê nodârs cul non Aloisio, l’ultin al à fermât di lavorâ tal 1793. Lis personis di un ciert ranc che fin tal Cinccent a risultavin residentis a Belgrât (1548 Domenico q. Carlo Aloviseo notaio di Belgrado; 1569 Girolamo q. Domenico Aloviseo notaio di Belgrado), dal Sîscent a risultin trasferidis a Bertiûl.
1925 Ottorino Aloisio, che tal 1921 al jere stât campion di Italie di salt in lunc, a Rome al è il prin laureât in architeture moderne in Italie. Al jere nassût a Udin tal 1902 (Nazzi, 2002).