Al è probabil che al derivi dal non, o sorenon, feminin Bona, cuntun sufìs che nol è par fuarce dispreseatîf. Al è presint in diviersis areis de Italie setentrionâl (Triest, Comacchio, Ferare, Breguzzo tal Trentin, e v.i.). Te nestre regjon si lu cjate massime a San Ganzian; mancul a Pordenon e Monfalcon. Il toponim Casa Bonazza si lu cjate tai comuns di Concuardie (chi ancje Case Bonazza e Tenuta Bonazza) e di Cint (IGM).

Viodi Bonazza. Cognon pal plui lombart presint a Udin.

Cognon tipic di Masaruelis (Torean) di dulà che al è emigrât te val dal Nadison dongje (1699 Leonardus filius Valentini Bonaz de Masaruelis). Al è probabil che il cognon al derivi di une forme contrate dal non di persone, e di sant, Bonifacio, cu la zonte dal sufìs dialetâl sloven -ac (-az te grafie taliane) cuntun valôr diminutîf. Pai slovens Sant Bonifaci, Sant Servazi e Sant Pancrazi a son i “oms dal glaç" o ledeni možje che la Glesie e ricuarde ai 12, 13 e 14 di Mai. Al sucêt, di fat, che in chel moment dal an a rivin dal Nord de Europe su lis nestris regjons massis di aiar frêt acompagnadis ogni tant ancje di nêf che e cole a cuotis plui o mancul bassis (Zuanella, Dom, 6, 1977). Tal 1732 Valentin Bonaz di Masarolis fitt. nobb. de Puppi (ASU Col.-Mels III part 32).