A son diviersis pussibilitâts di interpretazion: di barba, o barbàn, “barbe", di barba tal sens di ornament dal barbuç, o dal non di un pes clamât barbo o barbio (il barp). O ricuardìn però che Barbiano al è il non di diviers centris abitâts (in provincie di Ravene, Arezzo e Bolzan), e no podìn escludi il concors di Barbeano / Barbean, abitât dongje di Spilimberc. Il cognon si lu cjate a Cividât, Muimans (culì documentât dal Sietcent), Udin e Colorêt di Montalban. A Cjassà il toponim Barbians: prâts in plan, segnâts di cisis di olnârs, in part aratîf, fin li de strade pe Braidemate; si slargjin a Sud tal teritori di Tresesin; intal stes comun ancje Barbian: riulut che al cor sul fonts omonim di Est a Ovest e che si bute te Sfueime, dopo vê fat di confin, tal so prin toc, cul teritori di Tresesin (Mattioni, 1923). Si trate, cun ogni probabilitât, dal Barbian che Desinan 1982 al censìs a Tresesin, sul confin cun Montegnà (1295 Barbianum), e che al sarès un prediâl di Barbius. Intal comun di Cividât il toponim Barbiano, cuasi dal sigûr dal cognon, si lu cjate te Cjarte topografiche dal Ream Lombardovenit publicade tal 1833; si cjate tant che Barbiani inte prime taule dal Istitût gjeografic militâr (an 1891, taule “Prepot"); inte taule dal 1991 al è Barbianis.