Di un sorenon riferît a une persone di stature basse. Presint a Pordenon.

Cognon di olme venite, derivât di un sorenon simpatic. Intal Schedari Corgnali: 1290 D. Iacobus Basadona a Tumieç, tal 1296 aveva un maso a Mogliano Veneto. Presint a Udin e a Tumieç.

Dal non personâl gjermanic Baso o pûr, mancul probabil, di un Baso contrazion di *Bartolomàso, che al è un cjarinatîf di Bartolomèo. Il sufìs al puarte indenant il plurâl neutri latin -alia, forsit intindût te Basse Ete di Mieç tant che un singolâr feminin riferît a une "famee" o a une "cjase" (Rapelli, 1995). Presint a Pordenon.

Basaldella al è il non di doi centris abitâts, un in comun di Cjampfuarmit, chel altri in comun di Vivâr. Il cognon al è avonde slargjât a Davian; presint a Top (1655 Valentin Basaldella capitanio di Toppo; 1808 Borgo dei Basaldelli), Udin, Basilian e Martignà.

Dal non dal centri abitât di Basandiele (talian “Basaldella") che al è in comun di Cjampfuarmit. Cognon presint a Udin.

Cognon presint a Gurize. Salacor di colegâ a Baschiera (viodi).

O din la peraule a Bongioanni 1928: “Etimologjie une vore misteriose. Mancjant di miôr, mi pâr che no sedi di refudâ il langobart abiscaro, aviscaro, che par Weber al sarès “il sorintendent ai trops dal re"; il Brückner invezit al interprete biscario tant che “uficiâl judiziari" o alc di simil. Tra chescj doi todescs savints no vûl fâ di arbitri". Za Olivieri 1923 al confutave lis ipotesis ca parsore e al puartave in cjamp Villa Baschera, localitât di Grantorto tal Padoan  (duncj un toponim), il bas latin basclerius “sorte di spade", il talian antîc “bastiera", il feminin dal trentin bàscher “balinere, sacut dulà che si tegnin i balins", che a Rovereto al sarès ancje “coglia"… Plui inzornât, al è evident, Rapelli 1995: “Di un sorenon tirât fûr di une vôs venite *baschéra o *baschiéra (ma ancje *baschèra, *baschièra, daûr de zone) che al vûl dî “sfodre, custodie (di spade o di curtìs)". Chê vôs, che no cjati documentade, e je ricostruibile daûr dal talian baschiera “nature de femine" (citât di A. Oudin, 1663), istrian baschèra “sfodre di un curtissat ", trentin bàscher “balinere"; a Rovereto “coglia". Cognons di chest gjenar si cjatin a Vignesie  (Baschièra), tal trentin (Baschèra), a Udin (Baschièra, Bascarutti); di rimarc al è che tal Dusinte al è in Toscane un Baschiera de’ Tosinghi e il toponim florentin Porta del Baschiera, dulà che la peraule e pues jessi une intrusion che e rive des Veneziis". No podìn, però, trascurâ Violi 1996 cuant che al trate dal cognon Baschieri: “Al è un cognon vîf in diviersis bandis dal teritori modenês, e al rimonte al non propri Baschere, Baschera, atestât a Modena dal 1162. Intun document di chel an, di fat, il vescul Indrì al concêt a fit terens  a Vaciglio, a un ciert Baschere “filius Dominici de Saxolo". In documents di dopo, dal 1163, dal 1173 e dal 1175, o cjatìn il stes non, tant che confinant di terens de stesse zone. Si trate cuasi dal sigûr di un non di mistîr, passât a non propri. Vâl a dî dal latin vascularius “vasâr; oresin" “fabricant di vâs di metal preziôs" si è passâts a *bascularius Þ *basculerius Þ +basclerius cul v- iniziâl in b- (come tal medilatin basca par “vascje"), e cul scambi dal sufìs -erio par -ario e la colade de -u- mediane, daûr di une normâl evoluzion fonetiche. In chel mût, di *basclerius si è rivâts a Baschere e Baschieri". Un Canciano Baschera da Vendoglio tal 1453; Daniele q. Giovanni Baschiera di Vilote di Cjons tal 1489; Baschera Nicolò q. Pietro di Asio cjamerâr de plêf di San Martin tal 1490; Giovanni q. Nicolò Baschiera de Clauzeto tal 1525 (Schedari Biasutti); Simon Basciera da Sedran tal 1542; Valentina Baschera de Borgo Viola tal 1554; Leonardus Bascheruttus a Atimis tal 1571; Bulfonus q. Joannis Baschera de Adegliacco tal 1580. A Feagne tal 1684 Baschera Pietro qm. Giobatta, e di li il toponim Mont di Baschère (Zucchiatti 2000; Zucchiatti 2008, 30-31). Il cognon Baschiera si lu cjate a Clausêt (1515 Nicolao q. Petri Baschiera de Clauzeto), Davâr e Udin (cetant presint a Triest). A Feagne e sorevîf la forme Baschera. Un “borc Baschera" a Trep Piçul (tal catapan di Buie si cjate un Lenardo Baschiera de Treppo parvo tal 1488) in comun di Trep Grant; Buse di Baschere al è un toponim a Cjassà: prâts in val, di Nord a Sud, che si slungjin ancje bande Trep Piçul. Fûr par li al passe il riul Trep, che al tocje il borc Baschera di chel paîs (Mattioni, 1923).

Cognon presint a Premariâs. A Udin la forme Baschini.

Come Baschiera (viodi), cuntun sufìs incressitîf. Par Rapelli 1995, si trate di un sorenon che al ven dal veronês antîc bascheròto, non di mistîr di cui che salacor al faseve sfodris di ram pes spadis (come che si desum di un pas di Zagata: ‘Che non sia alcun Ferraro, Calderaro, Bascherotto, o altri che vendon rame…’). Presint a Udin.

Di Baseggio, forme venite dal non di persone “Basilio". Cognon avonde slargjât tal Venit; presint a Pordenon e a Bibion.

O ipotizìn che si puedi tratâ di un derivât dal non di persone “Basilio": che si pensi aes formis venetis Baseggio, Basèio… (Olivieri, 1923). Un Georgius Basel de Resiuta tal 1548. Baselli al è presint a Top (1583 mastro Antonio Fabbro detto Basel; 1587 mistro Simon Basello; 1599 mistro Zuane Basello favro) e Rude; une vore slargjât a Brescia. Basello al è tant difondût a Cjasteons di Strade, dulà che al è documentât za sul tacâ dal Cinccent (Costantini, 1972); presint  ancje a Udin.

Dal ebraic bath “fie di…" e zewi “cierf, dame" che al jere il simbul de tribù di Nephtail (De Felice, 1980). Presint a Udin.

Cognon carateristic de Italie meridionâl (pron. Basìle), dulà che al è une vore frecuent. Al ven dal non di persone Basìlio (De Felice, 1978). Presint a Udin.

Basìli e je la version furlane dal non di persone “Basilio". Presint a Aquilee e a Grau.

Incressitîf di Basìle, variante dal non “Basilio" proprie dal Meridion  de Italie. Presint a Bibion.

Cognons une vore difondûts e derivâts di sorenons origjinaris che a si riferissin ae stature basse de persone. Bass, la forme mancul frecuente, si cjate a Aquilee e Çarvignan; Bassi al è avonde ben rapresentât a Udin e Listize, cun daûr Reane, Pasian di Prât, Monfalcon, Cjassà, Gurize (chi al pues jessi une italianizazion di epoche fassiste di Bassich), Magnan in Riviere, Roncjis di Monfalcon, Pordenon, Feagne (viôt Zucchiatti 2008, 31), Puçui, Tarcint, Paulêt, Tavagnà, Lignan, Tresesin, Cjampfuarmit (di Udin intal 1896), Basilian…; Basso si lu cjate massime a Pordenon, Udin, Sacîl e Davian, e po dopo a Prate di Pordenon, Tieç di Daçan, Purcie, Premariâs, Cordenons, Monfalcon, Puart, Spilimberc, Gurize, Manzan, Paulêt, Feagne (viôt Zucchiatti 2008, 31-32), Pasian di Pordenon, Pavie, Concuardie, Grau, Cormons, Cjampfuarmit (di Colorêt di Prât), Setim di Cint… Castellarin 1991 lu cjate a Visopuli di Fossalte, Danon, Bibion, Cjaurlis, Cintiel di Tei, Cint, Gruâr, Tisane, Lignan, Muçane, Pradipoç di Puart, Puart, Il Pramaiôr, San Zorç di Noiâr, San Stin, Spadecente di Danon, Sumaghe di Puart. In comun di Murùs il toponim Borgo Bassi (IGM).

Al vûl dî “che al è a stâ o che al rive di Bassan" (viodi Bassàn). Presint a Gurize, Udin, Grau.

Viodi Bass.

A Gurize e pues jessi italianizazion di ete fassiste di Basin. Tal 1661, ai 9 di Setembar don Stefano di Pietro Chiuch da Salcano – il nob. Andrea Bassini da Salcano gli fa patrim. eccl. (Patrimonis).

Di un sorenon che al fâs riferiment ae stature basse di une persone. Pe localizazion, viodi Bass.

Atestât a Pucinie tal 1884. Basso al à ae fonde l'adietîf bas e Bondini al è componût dal adietîf bon e dal non personâl Dino, ipocoristic aferetic di nons che a finissin, te forme diminutive e cjarinative, in -dino, come par esempli Bernardino, Corradino, e v.i.

Di bas, sorenon cuntun significât evident, cu la zonte di un sufìs diminutîf. Presint a Cjastelgnûf e a Spilimberc.

Di Bassano del Grappa, centri cognossût in provincie di Vicence. A esistin, dut câs, altris centris cul stes non (intes provinciis di Ancona, Varese, Brescia, Viterbo). Bassanus al jere ancje non di persone: tal NA o cjatìn un Bassanus de Osnago mans. Aquil. et plebanus S. Petri ultra Isuncium. Tal Schedari Corgnali: 1487 Piero Bassan de Mançinello; 1497 Bassan, -no precone comunis Utini. Il cognon al è cetant slargjât tal Venit; te nestre regjon si lu cjate a Spilimberc e a Basandiele di Cjampfuarmit (rivât culì tal 1875 cun  Giuseppe Bassani, clamât Talian, nassût a Castelfranco Veneto). La forme Bassano e je aromai rare a Riu di Paluce, dulà che e je documentade almancul dal Cinccent: 1594 Florianus Bassani de Rivo; 1628 Candussio Bassan (De Stefani 2003, 163).

Diminutîf di “bas". In origjin si tratave, duncje, di un sorenon riferît ae stature. Intal Schedari Corgnali: 1271 Iacobus dictus Bassetus a Glemone; 1590 Petrus Bassettus a Pristint. Bassét si lu cjate a Vildiflum; Bassetti a Montine e Pristint (tal comun di Torean), Cividât e Udin; Bassetto a Corve di Daçan, Puart e Cordenons.

Cognon soredut dal Trevisan, presint a Pordenon e a Cordenons. Dal non antîc di mistîr bastaso,o ben fachin, cun traslâts tant che “om malcreançôs" e “trâf grues di supuart" (CI 171).

Cognon “ibrit" furlan sloven: di Bastian “Sebastiano", cul frecuent sufìs sloven dal cognon -čič (culì scrit -cig).

Diminutîf di Bastian, che al è forme aferetiche dal non di persone Sebastiano. Cognon une vore frecuent tal Venit; di presince antighe a Dardâc, dulà che al è ancjemò avonde slargjât (A. Fadelli, inf. pers.); rapresentât a Udin e Pordenon.

Di Bastiano, forme aferetiche dal non di persone Sebastiano. Tal Schedari Corgnali: 1314 Bastiano de Scludiç; 1481 Bastian de Porta de Ronc a Udin. Si lu cjate a Gurize (culì italianizazion di ete fassiste di Bastiancic e Bastiancig), Cormons, Caprive. Tal 1626 Michel di Bastian di Betta di Oleis, in Abbazia Rosazzo (ASU CRS 409 bis/6).

Di Bastiàn “Sebastiano", cul classic sufìs diminutîf -ùt. Bastianutti si lui cjate a Udin e Pasian di Prât; Bastianutto a Jesolo e Udin.

Cognon presint a Gurize, che al ven di une forme slovene scurtade dal non di persone Sebastiano (Merkù, 1982).

Di un sorenon che al à un significât evident. Intal Schedari Corgnali: 1466 Domenego Calligar del Basset de Borgo de Aquileia a Udin; 1556 Culau del Bas a San Lurinç di Solescjan; 1559 Jacomo del Basso de Romans di Varmo a Udin. Presint a Pinçan e a Udin.