La base di chest cognon e je il non di persone, Benvenuto che, riferît a un fi une vore volût, al veve il significât di “venuto, nato a proposito" (De Felice, 1978). Intal Schedari Corgnali: 1279 Benvenutus plebanus Sacili qui dictus Bonus; 1296 Benvenuto medico vulnerorum de Glemona; 1300 Benvenutus de Utino; 1300 Benvenuto de Flagonea; 1302 Benvenuto dicto Bençivegna a Vençon; 1338 Benvignudo a Maran; 1432 Utini in Foronovo ante Stationem magn. Benvenuti rectorio scolarum. Tant che Benvenuti al è presint a Gurize e a Glemone; tant che Benvenuto al è avonde difondût a San Vît dal Tiliment, presint a Siest, Puart, Codroip, Pordenon, Manià, Monfalcon. Al è documentât un câs dulà che il non Benvenuta/Benvignuda al è stât dât a une nocentine; tal 1443 il cjamerâr Serzi (ancje Serzius e Serzium) de confraternite di Sante Marie o dal Ospedâl di Vençon al scriveve cussì: 1443 adi primo otubrio fo trovada 1 puta in la glesia de madona santa maria laqual non era batizada la fo batizada adi 3 di otubrio fo posto nome bevignuda fo compare meser aloy e meser Janzil Snaider... Intal stes document si cjate ancje il non Benvenuto:... per nolo de un caval cavalcho ser beltram a tolmeç per esser con ser bevignut soldi 8.