Forsit dal venit bolzón “frece", “balestre" (Olivieri, 1923). Pal Boerio i bolzoni a jerin “imprescj di vuere antîcs, che si dopravin par dâ colps aes muris des citâts e des fuartecis", ma bolzón al vûl dî ancje “pontarûl, sorte di cugn par bati lis monedis e ogjets simii". Il NP al ripuarte bolzón tes zontis e, dongje dal significât di “bolzone", ancje chel di “pontarûl di puint".
Al somee tipic di Feletis (Bicinins); presint ancje a Udin, Cjons, Brugnere (e te zone di Trevîs, massime a Castelfranco).
Tal 1458 Bolzon Ser Nicolò da Treviso al jere Cjapitani di Udin (Biasutti).
fonts
1745 Iseppo Bolzon, cameraro Fraterna B.V. d. Centura di Dannon (ASU CRS 6); 1780 Mattia Bolzon fittuale in Lauzaco dei nobb. Caiselli (ASU Perusini 274); 1796 Antonio q. Dom.co di Giorgio detto Bolzan di Felettis fittuale nobb. Colloredo (ASU Col.-Mels III part 99).
Ancje se a Feletis i Bolzon a son numerôs, in paîs no ai cjatât la presince di chest cognon tal tant materiâl che o ai podût visionâ. Par gno cont, duncje, la atestazion dal 1796 e indiche che i Bolzon fin al Sietcent si clamavin di Giorgio dits Bolzan parcè che a rivavin di Bolzan di San Zuan dal Nadison dulà che e je ancjemò une presince di Di Giorgio.