Chest cognon al derive de localitât Borjána (Boreane) cul sufìs dialetâl -ac (par sloven standard al sarès -ec), scrit -az te grafie taliane. In principi si riferive duncje al abitant o ae persone che e vignive di chel paîs, logât in chel che si clame Breginjski Kot, no lontan di Cjaurêt. Al è presint in dute la aree di confin dal cividin (Torean, Cividât, Pulfar, San Lenart, Prepot) e, cui cognons Berghignan e Berghinz, al testemonee une imigrazion antighe te Sclavanie de zone di Cjaurêt e, in particolâr, dal Breginjski Kot (Zuanella, Dom, 20, 1990).