Dal todesc Kutscher “cui che al vuide carocis" (Frau, 1989) o dal furlan cùcjar cul significât compagn. A Glemone tal 1547:... tanti dati al fiolo del cuchier per mandarlo a Udene a portare una littera... Il cognon al è tipic di Dalès di Trasaghis (1554 Stefano Cuchiarino; 1581 Leonardo Cucchiaro) dulà che al è une vore difondûî. Al è ben rapresentât ancje a Glemone, dulà che al è documentât almancul dal 1557 (Zuan Hieronimo fiolo d’Piero Cuchiar) ma, salacor, il cuchier che si è dit al jere za un cognon; tal 1625 Spesi jn Candelle di sebo libra una tiolte da Mattia Cochiero per il R.do Padre Predicattor... (13 fameis tal 1929). No podìn dî che i Cucchiaro di Glemone e vignedin di Dalès, ma dal sigûr cualchi Cucchiaro alessan al jere a stâ a Glemone tal ’500: tal 1583 Leonardo Cucchiaro di Dalès al compre robe di un so parint Francisco Cucchiaro q. Mathiae Glemona habitante e chel Mattia lu clamin de Alessio. Si cjate chest cognon ancje a Tumieç, Osôf (1625 Jacobus fil. q. Joannis Cuchieri de Alexi; 1631 Cattarina filia Stephani Cuchiari di Villa Peonis), Udin, Paulêt, Tarcint, Tavagnà, Peonis di Trasaghis (1595 Valantin Cuchier; 1604 ms. Valentinus Cuchiarus de Alessio incola Peionis; 1618 Valentinus Cuchiarus q. Stephani, de Allessio habitantis in villa Peionis). A Glemone al è il toponim Casa Cùcchiaro (IGM).