Al è il non di un mistîr che, in origjin, al indicave cui che al produseve carbon vegjetâl o che al jere espert di poiatis. Chest cognon al jere a Briscjis e a San Pieri dai Sclavons za ai prins dal Sîscent (vuê al è restât dome a San Pieri) e cualchi volte si lu cjate segnât sui libris parochiâi di San Pieri ancje te forme slovene locâl kúotar. La ativitât di cjarbonâr, presint te Slavie furlane prime dal 1600, si è disvilupade soredut ae fin dal secul XVII e ai prins dal XVIII. Lu si pues pensâ dal fat che in chê ete a jerin tancj cjarbonârs tes valadis dal Nadison, une presince documentade ben tai libris parochiâi. Si à di notâ che la plui part di lôr a vignivin dal Friûl di soreli a mont, soredut di Midun, dulà che al somee che la ativitât di cjarbonâr e fos une vore indenant (Zuanella, Dom, 14, 1994).