O vevin pensât a cieul, il non dal pes che si clame ancje “bolpine”. A Cimolais ciol al vûl dî “riul” (cussì Borsatti e Trevisàn 1994, invezit Appi E. e R. a àn scioi pe stesse peraule). Chest cognon nol è facil di sclarî: cui che al è plui dongje al è cence dubi Gianni Colledani che al sugjerìs che e sedi une forme aferetiche dal non Angiol “Agnul” che al pues vê mudât di -ğ- in -č-. No son di escludi formis aferetichis di (Lu)ciol, (Fa) ciol, diminutîfs di Lucio e Facio, che chest ultin al ven di Bonifacio. Roberto Moschion al da cualchi forme documentade a Voleson (1581 Gaparus q. Joseffi vocatus de Chiol; 1591 quei di Chiol) che a somein orientâts par un sun prepalatâl (duncje cu la grafie di cumò Cjol) pe cuâl lis ipotesis che o vin dit prime no son plui validis. E se al fos la forme aferetiche di Matiòl, diminutîf di Mattia, palatalizât in (Ma)cjòl? Al è presint a Cjasarse e a Tei.