Al è un cognon sloven tipic dal paîs di Ročinj te Val dal Lusinç (Kámenšček tal sloven standard). De Val dal Lusinç al è emigrât tal Cjanâl dal Iudri li dongje, a Oborze (comun di Prepot) dulà che al jere za presint tal 1610: Steffano Camansich di Oborza (regjistri de Confraternite di Madone di Mont). Tal 1810 al è rivât ancje te valade di San Lenart cun Joannes filius Joannis Camenscig di Ročinj che al maride une femine di Bride disore. Cul 1855 si tache a scrivilu in maniere falade Comenscig lant indenant in cheste maniere fin vuê. Un fi di Joannes si è trasferît a Scrut di San Lenart dulà che il cognon al è ancjemò presint. Comenscig (che al sarès miôr Camenscig), scrit Kamenšček te grafie slovene, al ven di un microtoponim come Kamen o Kamno “piere, cret”, cu la zonte dal sufìs -šček. Duncje, in principi al voleve dî di une persone che e jere a stâ intun puest cognossût tant che Kámen, o alc di simil, te valade dal Lusinç di mieç. O pûr al voleve dî di une persone che e vignive di Kamno, un paisut te rive çampe dal Lusinç, tra Cjaurêt e Tulmin (Zuanella, Dom, 22, 1990).