Il cognon Covacéuszach / Kovačévščak al à a ce fâ cul toponim Covacevizza / Kováčevica (1638 Michaelis baudas de Covaceuiza; 1646 Blasij Crisnigh de Couaceuiza; e vie indenant). E je une piçule frazion dal comun di Prepot che dal pont di viste eclesiastic e fâs part de parochie di San Lenart. Chest toponim si è fat a partî di un non sloven di mistîr, kováč “fari” e si è disvilupât dal adietîf kováčev cumbinât cu la formante -ica: in principi al voleve dî di “un teren o une proprietât di cualchi fari”. Dopo, dal toponim Kovačevica (in dialet Kovačéuca) cu la formante -ščak, al è vignût fûr il cognon Kovačévščak / Covacéuszach che, in origjin, al indicave un abitant di Covacevizza o une persone che e vignive di chê bande li (Zuanella, Dom, 20, 1988).