Dal non di femine Flora. Carateristic di Runcjis (Fontanefrede) li che al è documentât almancul dal 1554 cun Vincenzo della Flora Ceolin. In origjin, duncje, al jere un matronimic de famee Ceolìn (Pes e Fadelli, 1993). Presint a Pordenon.

Dal stes non di femine. Al è a Paluce, Udin, Pordenon, Sacîl. Tal Schedari Corgnali: 1382 Flora de Palaçolo; secul XIV Flora de Muscleto; secul XIV Dominica dicta Flora a Ravose; 1451 Dominicum de Flora a Pordenon; 1937 Flora 7 fameis a Enemonç; 1938 Flora 16 fameis a Paluce. Tal 1405 Domina Flore uxor Thome quondam Petri de Moiimaco (Ziani, 1999).

Flóram al è un dai cognons endemics di Pean, tal comun di Pulfar, e al à dât il non a un dai tancj siei borcs (Flórmi, che al è la forme plurâl di Flóram). Dai documents che o vin (1615 Antonio Furloram de Pegliano; 1617 Laurino Farlorum de Pegliano; 1623 Giesa Furlorma de Oflan; e vie indenant) al risulte che la forme origjinarie e sedi stade Furlóram o Forlóram tramudade dopo par aplosi in Flóram. Chest mudament si à vût sul principi dal Sietcent (filius Valentini Floram de Pegliano tal 1718), ancje se la forme antighe e je presinte, rare, tai Libris dai muarts fin ae metât di chel secul (filius Thomae Forloram de Azida tal 1750). Di Pean, dulà che al è ancjemò presint tal borc di Flormi, il cognon al è emigrât jù te val, a Prepot, Udin, Torean e tal comun di Faedis (Sofumberc, Faedis e Cjampei), dulà che al è presint massime te forme Floran. Al è di notâ che tal dialet sloven dal Nadison, lis finâls des peraulis in -am si à di pronunziâlis -an. Cussì si sclarìs ancje il passaç di Flóram a Flóran. Dal rest, cheste seconde forme e je regjistrade tai Libris dai muarts di San Pieri dal Sclavons za tal 1740 cun Marinus Floran de Peano. O pensi che al sedi un cognon che al ven di cualchi fonde lessicâl todescje che però no je facile di determinâ cun sigurece; dut câs, nol à nuie a ce fâ cu lis rosis, cu la floriculture o cul non di Sant Florean (Zuanella, Dom, 11, 1997).