Il sufìs -òt al coventave dispès par fâ tiermins etnics o sedi par indicâ di dulà che une persone o une famee a vignivin (viodi Spessòt, Medeòt, Musclòt, Cjanalòt, e vie indenant). Considerât che a Monfalcon une volte e jere Villa Fontane (documentade tal 1495), Maurizio Puntin (informazion personâl) al pense che al sedi pussibil che i Fontanòt a sedin origjinaris di chel Borc. Il cognon al è documentât tal 1563 a Roncjis di Monfalcon. In Etnici 2008, 57 o leìn: "Il cognon Fontanot al è documentât a Soliscjan (Roncjis di Monfalcon) za tal secul XVI e al è probabil che al fasi part dai nons di persone neolatins plui antîcs de zone di Monfalcon (adun cun Fulizio, Miniussi, e vie indenant)". Tal 1741Francesco Fontanot della Vicinia di Monfalcone (ACAU 737). — Par Bonifacio 1999(b) al è un cognon di Cjaudistrie difondût a Monfalcon, Roncjis di Monfalcon, Staranzan, Udin: “... i Fontanòt si son maridâts ancje a Monfalcon, dulà che il prin Fontanòt di Cjaudistrie si jere maridât za tal 1902, si che vuê o cjatìn te zone di Monfalcon 13 fameis Fontanòt a Monfalcon (dulà che e je ancje une Via Fratelli Fontanot), 18 fameis Fontanòt a Roncjis e 2 a Staranzan, une a Udin, simpri di divignince di Cjaudistrie; tal 1976/1977 a jerin invezit 20 fameis Fontanòt a Monfalcon, 10 a Roncjis e 1 a Staranzan".