Al ven di marder (o mardar), o ben 'martar'. In origjin al sarà stât, duncje, un sorenon. Al è un dai cognons tipics di Glemone, li che al è documentât almancul dal 1547 cun Simon del marder, Josepha filia Antonii Marderis (18 fameis tal 1929); presint ancje a Udin. Il non di chest animâl al è doprât in dì di vuê tant che non di cjasade: Màrder tra i De Cecco di Braulins (comun di Trasaghis), Màrdar e je une famee Del Bianco a Mene (comun di Cjavaç), Mardarùç tra i Piazza di Tarnep (comun di Bordan), Màrdar a Dieç (comun di Tumieç), e v.i. Tal Schedari Corgnali: 1408 ad instantiam Mardalosie a Glemone; 1468 Alovisium del Marder (ancje Mardar) a Udin; 1508 Piero del Marder d’Amar; 1528 Io. Petris del Marder a Buie; 1536 nobilie del Marder de Utino.