Cussì nus al displee Moroldo 1999: “Mai un cognon di Damâr al à patît tantis trasformazions vie pal timp tant che chel dai Malagnini! Denant de cuantitât di no crodi di variazions grafichis, al ven di pensâ che o i plevans a trascrivessin formis argagnadis o di dialic, o ben che i stes Malagnini a mudassin il propri cognon daûr dai timps o parfin daûr dal umôr personâl. Tirant jù a la letare dai regjistris, o cjatìn Magnanins, Magnaninis, Magnalinis, Magnalini, Magnanini, Malagnins, Malagnino, Malagninis e in ultin Malagnini. Chestis formis, cun di plui, no van une daûr chê altre cun regolaritât, come se si les indevant viers une stabilizazion de forme cognominâl, ma si ripetin in maniere cicliche cence un leam significatîf se no chel stabilît volte par volte dal plevan o dal utent dal servizi eclesiâl... Si pense che la stirpe e podarès jessi rivade a Damâr oriunde di Magnanìns, borgade di Rigulât, e chest al podarès displeâ la prime forme dal cognon che al sarès nassût cun ogni probabilitât dal toponim, vâl a dî dal lûc di divignince"". Ce facil che al è falâ cui cognons! Cuant che no cognossevin la vore dal Moroldo o vevin fate nestre, in mancjance di alc di miôr, la ipotesi di Bongioanni 1928, che daûr di lui “al podarès rivâ dal non di femine Maddalena traviers la forme popolâr, venite e ligure, Malena"". Il letôr che si cjaparà il fastidi di dâ une cjalade aes atestazions antighis riferidis ca devant al rivarà, par altri, ae conclusion che Malagnìn te Ete di Mieç al jere un sorenon e un non di persone; la ipotesi patronimiche e po duncje sentâsi dongje di chê etniche. Tal 1345 Maynardus dictus Malagninus f. q. Iohannis Claude de Domanisso (Bortolami, 1997); tal 1372 a Muimans un Nicolao dicto Malignino fornasario de Rubignaco (Ziani, 1999); tal 1476 Leonardo Malagnino de Furno Avoltro (Dell’Oste, 1999). In Corgnali: 1339 P... dictus Malagninus a Manià; 1350 Pelegrino dicto Malagnino de Montenars; 1361 q. Malagnini de Glutic a Codroip; 1364 Malagninus a Feagne; 1416 Malagnino a Buie; 1468 Pasculus Malagnini de Impontio. Il cognon Malagnini al è avonde difondût tal Bressan, ma no vin elements che a podedin provâ une afinitât linguistiche cul nestri o une origjin gjeografiche comune.