Diminutîf dal non di persone Marco. Tal Necrologium aquileiense si cjatin un Marcolinus prebendarius e un Marculinis Zorzanus; tal Diplomatarium portusnaonense un Marculinus de Corva tal 1456. Tal Schedari Corgnali: 1222 Marcolinum de Fana; 1326 Marcholinus de S. Stino; 1327 Marculino cerdone de Gavo a Sanguarç; 1332 Marcolino Stationario de la Marca a Siest; 1331 Marcholini not. de la Motta; 1456 Marculinus de Corva; 1327 Marculinus Boccapilosa massarius a Glemone; 1370 Marchulinus de S. Margherita. In OT 115 domine Nicolotte uxor Marculini. Marcolìn al è difondût soredut tal Venit; presint a Mortean, Davian (1450 Antonius Marculin), Pordenon e Udin. Marcolini si cjate a Cividât e a Tumieç. I Marcolini cividins (aree di Madriûl) a vegnin di Prepot; in chest comun e je une piçule frazion clamade Marcolino, par furlan ‘Marculin’, che il non uficiâl di cumò al è stât creât dal cognon. La piçule borgade, par dî il vêr, si clamarès Lasizza, italianizazion dal sloven Laišče (dialetâl Laišča) che al vûl dî “piçule largjure”. A Madone di Mont, te viuce che e mene al Santuari, si po olmâ, lant in sù su la drete, “un portâl antîc che, su la sieraie, al puarte la date MDCXI (1611) sot di un steme cuntun faiâr sore di purcit che al passone. E je la steme de famee Marcolino di Lasis (Laischa o Lasizza), une ore a Soreli jevât di Madone di Mont, che e à dât il non su lis cjartis topografichis ae borgade omonime di Marculin. Adalt si viôt ben che il non Marcolino al è stât scarpelât; chest al capità tal 1653, cuant che Pietro fi di Marcolino al fo obleât a vendi la sô cjase al Santuari. I antenâts di Marcolino a figurin, bielzà dal secul XV, un grum peâts a Madone di Mont. A forin tra i fondadôrs de confraternite di Sante Marie ae fin dal Cuatricent e il stes Marcolino al fo tra i fondadôrs de confraternite dal Santissim ae fin dal Cinccent. Tal borc Marcolino, lant jù a Soreli jevât di Madone di Mont, e je une altre cjase cu la iscrizion: 1603 dì 22 giugno io Marculino et Filippo fratelli di Lasig a laude di Dio et Maria havemo fatta sta casa. I Marcolino a jerin grancj arlevadôrs di purcits e par nudrî lis lôr mandriis a passonavin in maniere abusive in dut il teritori ator dal cjistiel. Di chest, litighis cence fin, che ju oblearin a vendi la dimore di Madone di Mont” (Biasutti G., Castelmonte – Guida storica del Santuario, edizion dal 1992, riviodude e inzornade par cure di p. Aurelio Blasotti). Il cognon Marcolini al è nassût tal 1600 cuant che al à cjapât il puest dal cognon locâl tipic Luchesig, documentât za ae fin dal 1400. Il progjenitôr de famee Luchesig di Lasis salacor al jere tra i cofondadôrs de confraternite di Madone di Mont e i siei sucessôrs a son stâts plui voltis cjamerârs de stesse. Te liste plui antighe che e ripuarte i nons dai socis regjistrâts ae fin dal 1400 o cjatìn Michael Luchasiç e Heler Luchasichiç. Il prin al murì intant che al lave in pelegrinaç a Sant Jacum di Galizie (Michael Luchasichç qui mortuus est in via eundo ad Sanctum Jacobum Galitiae), invezit il secont al è documentât tal 1498 come Heler q. Luchas de Layscha. Il passaç di un cognon a chel altri si po documentâ cun chestis atestazions (ancje chestis gjavadis fûr dal Libri de “fraterne” di Madone di Mont): 1600 Agata filia Marculini Luchesig; 1608 Spella moglie di Marcolin di Lasiza cameraro della veneranda fraternita; 1612 Lucas seruo di Marcolin di Lasiz; 1621 Vrsiza figliola di Marcolin di Lasiza; 1630 Catarina figliola di Marcolin di Lasiza cameraro (Zuanella, Dom, 16, 1996; 11, 2000).