Cognon gurizan presint par antîc, te forme Mociunig, ancje tes Vals dal Nadison (Stregne). Al è nassût dal toponim sloven Močila cu la formante -nik e in origjin al indicave cui che al viveve a Močila o la persone che e rivave di chê localitât (tai prins dal 1500 Mathia Motzilnikch e Mathia Motziunijk Libri de “fraterne" di Madone di Mont; 1711 Hillarium filium Bartholomaei Mociunig de Mocille -Libri dai matrimonis di San Lenart). Močila e je une des tantis frazions di Kambreško, te rive çampe dal Judri (Slovenie). Il sostantîf sloven močilo al vûl dî “aghe impoçade, poce fate di une sorzint" (Zuanella, Dom, 19, 1989). Tal 1725 Ellaro Mociugnach de Postregna o Stregna.