Dal sorenon di une persone cui cjavei o cu la carnision scure. Viodi Moro. Presint a Puart.

Si lu cjate a Sudri e a Tumieç. Viodi Moro. Intal Schedari Corgnali: 1542 Ser Paulo del Moro bergamasco in Codroipo habit. Madrisio; 1521 Juri del Mor a Liusul; 1557 messer Rocho del Moro a Udin; 1616 Ser Christoforo del Moro a Paluce; 1675 del Moro a Liussûl; 1938 Del Moro 16 fameis a Sudri.

Cognon une vore difondût e cuntun significât clâr di “persone cu la piel scure" o “cui cjavei neris". Come non di persone al è documentât tal NA cuntun Moro stacionarius. Tal 1422, a Cividât, Mathia lu Moro si ha dat quinç di vin pignol XVII e selo uno e 1⁄2... Al è une vore rapresentât a Udin, Pordenon, Vildiflum, Puart, Çarvignan, Lignan, Cordenons, Cjaurlis, Codroip (i Moro di Basandiele di Cjampfuarmit a son rivâts tal 1889 cun Santo Moro di Passarian tal comun di Codroip), Sudri e Priôle (1692 messer Zuanne Moro giuratto dell’onorando comune di Nojarys); avonde frecuent a Gruâr, Sacîl, San Vît dal Tiliment, Tumieç, Trep di Cjargne, Paulâr, Montenârs (documentât dal 1591), San Stin, e vie indenant. Pe Cjargne, Puntel 1998 al scrîf: “La esistence de famee Moro e je documentade a Liussûl, so lûc di origjin, fin de fin dal secul XIV. Di fat, fin dai prins agns dal 1400 o cjatìn un esponent intun at notarîl dal presbiteri Stefano q. Francesco di Resiutta, vicjari di San Denêl di Paluce. In chest manuscrit a son tant che testemonis Iacobus filius Mori et Iacobus q. Murucutti de Ligosulo. Ducj i Moro presints in Cjargne a àn un antentât comun leât propit a cheste famee. Tal 1655 Agostino Moro da Cueste si trasferìs, cu la femine, di Liussûl a Trep, dant cussì origjin ai Moro di cheste localitât. I Moro di Sudri e Priôle a son i dissendents di Pietro Moro che tor dal 1660 di Liussûl si jere stabilît a Sudri. I Moro a son vignûts jù di Paluce in plui moments, massime tai secui XV e XVI, e li a àn dât vite a une des fameis plui numerosis e sioris dal puest: cumò no son plui, ma cualchi lôr dissendent si lu cjate a Tumieç". A Glemone tal 1571 Joannes Baptista filius Leonardi vocato lo Moro, tal 1584 Jacobi More de villa Sutri contrade Carnea (Tomat, 2001). ... La famee Moro di Liussûl e je stade ancje protagoniste di une vicende storiche e economiche impuartante che e met in evidence il snait e la voie di fâsi un avignî miôr ancje lontan dal paîs li che a jerin nassûts. Di fat, tal '700, in Cjargne, tal setôr tessil nol jere puest par gnovis ativitâts imprenditoriâls di là di chê di Jacopo Linussio, che si jere za afermade. Cussients de realtât locâl e determinâts a valorizâ e a meti in vore lis lor abilitâts e competencis te fabricazion des stofis, i doi fradis Cristoforo e Giovanni a emigrin in Austrie tal 1779 e tal 1784 in Carintie a vierzin une fabriche che e darà un grant sburt a dute la industrie tessile austriache. Po dopo, la fabriche e vignarà trasferide di Klagenfurt a Viktring e chest al puartarà a une produzion di nivel industriâl. E jere tant impuartante che l’imperadôr Francesc Josef al de ae famee plui ricognossiments nobiliârs (Puntel, 1998). I cognons che a fasin part dal stes cjamp semantic a son une vore difondûts. Ancje Màuro al pues stâi dentri, magari a la largje: il non di persone che al à dât il cognon al sarà stât peât ae "simpatie" par cualchi San Mauro ma, in principi, Maurus al jere etnic o sorenon di persone (come Moro plui tart). Compagn par Màur, Màuri, Màurig, Maurino, Maurutto. Il non Mauritius, che di chel al ven il personâl Maurizio, ancjemò difondût, e ancje il cognon identic, al è un derivât di Maurus (San Maurizi al è stât un martar tal secul III). No son, invezit, influencis di gjenar agjionimic tai tancj Negro, Negri, Negretti, Del Negro, Neri, Del Nèri, ducj cuntun progjenitôr che si jere vuadagnât il sorenon par vie che al veve une piel di colôr mediterani. Compagn, cela va sans dire, pai francês Negron, Néret, Nérot, Nègre, Noir, Noiret (simpri di là des Alps o cjatìn Moris, Mauris, Meuris, Morize, Morice, Morisse, Murice, Maurin, Morin, Moreil, Morelle, Morille, e v.i.). E clâr, anzit of course, pai britanics Black, Blackie, Blake, Blakey, e vie indenant; ancje di là dal Canâl, aben che a la largje, a son i derivâts di Maurus; o citìn Moor, Moore, Morrell, Morris cu la variante Morse, Morrison. Plui dongje di nô, dilunc dal confin orientâl, o cjatìn Cernèt, Cernétig, Cernic, Cérnigoi, Cerno, Cernóia, Cernòtta e l’ ibrit Moriélaz. Infûr che l'ultin, che al à une base (neo)latine, si puedin assimilâ ducj ai cecs Cerny e Cernik. Tra i cognons todescs Schwartz, Schwarz, Schwarzkopf. E o podìn sierâ cuntune sinfonie di Moro: Moràs, Morassi, Morassùt, Morassutti, Morassutto, Moratti, Moratto, Morelli, Morello, Morés, Morét, Moretti, Morettìn, Moretto, Morettón, Moretuzzo, Mori, Moriélaz, Morìn, Morini, Morinelli, Morossi, Moruzzi...

Forsit al è il diminutîf di maròc “stupit" (... noma ìa a podeva vîai insegnât a chel maròc di Toni una tâl scuela frase te fevele di Prât di Cjargne, dal NP). Un Zuan Maroch al è documentât a Tumieç ae fin dal Cuatricent. O di maròche “robe scarte". Maròc al è ancje il non di un pes di mâr (par talian, il Gobio ceruleo). No si à di escludi une derivazion dal adietîf moro, che al à un significât clâr, cu la zonte dal sufìs -òc, pôc frecuent (salacor cuntun valôr incressitîf) e dal sufìs -ùt, une vore comun e cun valôr diminutîf. Dopo di chescj resonaments ingredeâts, ancje se valits, o vin discuviert che Moròc al jere non di persone e o ripuartìn ce che al scrîf Puntel 1998: “Il non Morocco (par furlan Moroch o Maroch) si lu cjate in plui documents dal secul XIV che a tocjin la Val Pontaibe. Intun testament dai 21 di Novembar dal 1348, conservât intai archivis di Paluce, si fevele di un tâl Giovanni Morocho q. Nicolò da Lyusulo e di Pietro e Vargendo fîs dal q. Giovanni Morocco. Inte stesse date al è un Enrico Moroch di Zenodis. Ai 15 di Zenâr dal 1349 al è testemoni intun altri testament Enrico q. Morocco di Siai. Tal secul dopo si formaran i cognons di vuê cun cualchi variante. Cussì ai 21 di Mai dal 1476 Leonardo Muruchutti e Matteo q. Odorico Muruchutti di Liussûl a pain il fit ae glesie di S. Denêl par un cjamp. Cualchi an dopo a Taussie al è presint un ciert Matteo di Zuan Muruchut. Tal secul XVI chest cognon si slargje te valade, dongje dal vecjo Morocco che al finirà cun Giacomo (muart tal 1675) che, pal so mistîr di mulinâr, al ven clamât Molinaro e al da, in cheste maniere, origjin ae famee Molinari. In cambi, al lasse il so vecjo non di famee a un borc di Murçalis che inmò vuê al à non Maròc. Ma parcè Morocutti vignial colegât a Morocco? Parcè che Morocutti al è diminutîf di Morocco, tant che Biasutti al è diminutîf di Biagio e Miniutti al è diminutîf di Domenico. Morocco (par furlan Maròc) al è un non propri di persone une vore comun te Ete di Mieç ancje in Italie, che al è deventât ancje cognon (viodi Marocchi). Al è il non di un sant! Tal De Scotorum Fortitudine publicât a Parîs tal 1631, David Camerarius al aferme che San Moroc al jere l'abât de abazie di Dunkeld (Scozie) tal secul IX. La sô fieste si celebre ai 8 di Novembar. Il cognon Morocutti si difont intun prin moment a Liussûl e a Taussie. Di chestis dôs localitâts alì, al passe dopo a Trep di Cjargne. Giovanni, che al jere de prime gjenerazion dai Morocutti di Siai, al fâs sù tal 1631 la cjase dite Convènt a Treli (Paulâr), domandant ae comunitât di vignî acetât tant che vicin par podê maridâsi cuntune fantate dal puest. La assemblee de vicinie e veve dât un parê favorevul ae integrazion che però, di fat, no si puartà insom a dispiet dai sfuarçs di Giovanni che, ae fin, al à scugnût lâ vie e comprâ une cjase antighe a Zui, vile che e faseve part dal so cjanâl di origjin. Chest al sclarìs parcè che Giovanni al fo il progjenitôr dai Morocutti di Zui. Vuê i Morocutti a son presints in diviersis parts dal Friûl, de Italie e soredut in Austrie; in chest ultin câs, a son i dissendents dai cramârs o slaifers emigrâts intai ultins trê secui. In Gjermanie si clamin Morgott e a vegnin di un ciert Giovanni Morocutti Teck emigrât a Spalt, in Baviere, tal 1726. Te Val Pontaibe, ae fin dal 1997 a vivevin cirche 80 personis cun chest cognon che a rapresentavin il 10% de popolazion". Il cognon al è presint a Tumieç, Udin, Cjassà, Vile di Cjargne (e Bressie!).

Al ven di un non di persone di divignince gjermaniche (Rossi, 1987-88). Il non al è documentât tal 1301 propit a Damâr (Maroldus de Amar) dulà che, vuê, al è ben rapresentât tant che cognon. Al è atestât, tant che non, ancje cun Maroldo Jacobi a Fane tal 1339 (Rossi, 1987-88) e cun Maroldus aurifex tal NA. Tal secul dopo, in Cjargne (Cjanâl Pedarç) al cjape za sù lis conotazions di cognon: 1415 Nicolaus q. Nicolai Marolt de Pratodumbli; 1459 Petrum Maroldi de Prato (A. Roia). Intal Schedari Corgnali: 1222 q. Maroldi a Polcenic; 1300 Maroldum de Fana; 1301 Maroldus de Amar; 1323 Nicolaus dictus Maroldus Accanus de Cavacio; 1341 q. Maroldi a Buie; 1411 Lor. Maroldi de Maserijs. In plui che a Damâr, al è presint a Zui e a Tumieç. Tal 1930 a jerin 9 fameis Moroldo a Muntisel di Mueç, e 7 di chês a vevin tant che sorenon Maròlt. Pai Moròldo di Damâr o lassìn la peraule a Moroldo 1999 “Tai regjistris de parochie al è segnât tant che Marold (fin dal Cinccent), Moroldi (metât dal Sîscent) e po Moroldo (1680 cirche). La origjin documentade dai Moroldo e evidenzie che a son rivâts in plui moments de zone di Mueç e cun esatece di Mueç Disot, ancje se a somearessin oriunts de frazion di Muntisel, dulà che e je cualchi famee e segns clârs dal cognon. La ultime rivade, di Muntisel, e je chê che e à dât origjin ae cjasade dai Nìte. Altris ricercjis tal archivi de Abazie di Mueç a podaressin forsit confermâ che lis cjasadis dai Moroldo di Damâr a fasin part di une uniche gjernazie...". A For Disore al è il toponim in Maròlt.

Dal non di persone Amoroso, che al ven dal adietîf talian compagn cul significât di “une vore cjâr, amât" (Rapelli, 1995). Intal Schedari Corgnali: 1357 Dona Morosa a Udin; 1365 Morosa filia Dalperti a Mels; 1472 dona Morosa a Spilimberc. Si lu cjate a San Denêl, Tresesin, Codroip, Udin.

Al è probabil che al sedi come Moro (viodi), ma cu la zonte dal sufìs -òs come in Bertossi, Bottòs, Linossi, e vie indenant. Tal 1219 un Morossius de Sancto Quirino (D. P.). Intal Schedari Corgnali: 1459 dona Morossa a Udin; 1489 Dominici Morosso (o della Morossa) de Sclaunicho. Chest cognon al à une difusion buine a Cimolais e al è rapresentât a Pordenon.