Pluitost che dal non di persone antîc Mus (il latin al veve Mussius) al ven di une forme aferetiche, italianizade, di Jacumùs/Cumùs, diminutîf di “Giacomo" (1427 Nichulau fradi di Chumus a Udin), cuntun sufìs diminutîf che si cjate in altris cognons (Balbusso, Candusso, Venerùs, e v.i.). In alternative, al podarès jessi la forme aferetiche di diminutîfs di altris nons: Adamùs, par esempli tal 1353 Adamussio di Tricano e tal 1360 Matheo q. Adamusii de Utini (Corgnali), Beltramùs, e v.i. No escludìn, ancje se nus pâr mancul probabil, un sorenon di mus, “asino" par talian. Un Mus al è a Cividât tal 1191; un Domeni mus al è atestât a Maran tal secul XIII (Biasutti, 1956), un Amalrico dit Mus a Davosâs (Darte) tal 1324 (Gortani, 1895), la femine di un Odorlico dai siôrs di Dieç e jere clamade la Mussa tal 1328 (Gortani, 1895), lu Mus bariglaro a Glemone tal 1336, un Tomat çiner Mus a Glemone tal 1370 (Marchetti, 1934), Vegnuto filio Iacobi Musse a Rossêt tal 1342 (Bortolami, 1977), Margareta filia Thome Mussi simpri a Glemone tal 1379 (De Vitt, 2000), Dominicus qm. Musij a Cormons tal 1426 (FS). Intal Schedari Corgnali: 1344 Mussio de Cisterna; 1348 Odorico dicto Musio q. Martini claudi de burgo grazani a Udin; 1360 Muscio q. D. Jacobi de Manzano; 1363 Mussio q. Burdella a Feagne; 1382 Mussius de Rivignano. La famee dai Mussio e je fra chês plui antighis documentadis a Durcinins Disore (Çopule) (1465 Johannis fili Chandussi nominati del Mussi; 1476 Jacobo quondam Chandussi de Mussi de Urcinico; 1513 Zuanne q.m mastro Giacomo testor dei Mussi; e v.i.) (N. Petris). Chest cognon al è difondût ancje a Cjasarse e, dopo, a Codroip. A Nimis tal 1431 o cjatìn une forme diminutive in Simon di Mussulin, indicât ancje tant che Simon q. Giacomo Mussulin (Biasutti, 1979).