Par Olivieri 1923 al è il talian chiùrlo, “uciel dai caradriformis cuntun bec une vore lunc e fin curvât par jù e talpis lungjis". Al podeve volê dî ancje "om sturnel, basoâl". Ancje Boerio al ripuarte chescj significâts pal dialet venezian. Al è a San Denêl. Tal Schedari Biasutti: 1706 donna Anzola Chiurulo tesseva e lavava la biancheria della Congregazione Anime di S. Giacomo a Udine; 1788 Giuseppe Chiurlo (ancje Chiurilo) era contraddicente nella Confraternita di S. Lazaro, sapeva scrivere.

Elwys De Stefani mi sugjerìs une derivazion di une forme aferetiche di Matiùs, diminutîf di Matteo, o Mattia, duncje di Tiùs, pronunziât Cjus e italianizât cun Chiussi (par un câs simil si pues viodi Chieu). Duncje, al è di evitâ il vicentin chiusso che al vûl dî “catùs", un uciel rapaç noturni, e il venezian che, dongje di chest significât al à ancje chel metaforic di "durmion" (Boerio). La forme Chiussi e je tipiche di Dimplan dulà che tal 1617, Chiusso paga sopra i campi di Soravit L: 24 s. 51⁄2; si lu cjate ancje a Udin. Par Banelli 2001, 139 chest cognon al jere a Dimplan za tal secul XV e al à origjinât i toponims Crets di Chius e Cret di Sualdin Chius. Chiusso, in plui che a Vignesie al è ancje a Aquilee.

Il cognon sloven Chiúch (si lu pronunzie Čiúk) al jere tipic di Crostù / Hrastovije (tal comun di San Lenart), ma al podarès jessi rivât chi di Sverinaz (tal comun di Grimac) dulà che al jere presint fin dal Sîscent. Al è un zoonim o sei il non di un animâl: il sloven čúk “çus" al à cjapât, par traslât, un significât negatîf. La persone che e veve vût il sorenon di čúk (tal dialet sloven dal Nadison čiúk), che dopo al è deventât un cognon, salacor e jere un pôc “sturnele, indurmidide" (Zuanella, Dom, 17, 1990). Duncje, al è compagn di Zussino (viodi). Tal 1661, ai 9 di Setembar don Stefano di Pietro Chiuch da Salcano – il nob. Andrea Bassini da Salcano gli fa patrim. eccl. (Patrimoni), tal 1667 cooperatore in Carinzia (Filze).