SuperDizionari

batarie s.f.
(ba-ta-ri-e)

Schirie di elements metûts in ordin un dongje di chel altri

sinonims

schirie, serie, rie, file

esemplis

"sierâ lis bestiis tai cjamps di concentrament: batariis di vidiei un taco l'altri"

gjavât fûr di "I furlans e lis bestiis" di Riedo Pup

"un implant pe produzion di energjie solâr fat di spiei in batarie fin a trê voltis plui eficients dai panei normâi"

gjavât fûr di "Il soreli intun spieli" di Redazion il Diari

batarie s.f.
(ba-ta-ri-e)

[TS] (eletr.) Aparât di plui elements fat par inmagazenâ e furnî corint eletriche continue

sinonims

pile

esemplis

"al furnive corint eletriche ai filaments doprant batariis e une dinamo, duncje in corint continue"

gjavât fûr di "La invenzion dal vueit inte lampadine di Turo Malignani. Storie, gnovis ipotesis e atualitât" di Lorenzo Marcolini

"i vevi scjariât la batarie a la machine di papà a fuarce di scoltâ lis cassetis che al veve"

gjavât fûr di "Joe Tex e Joe Cocker" di Checo Tam

batarie s.f.
(ba-ta-ri-e)

[TS] (mus.) Grup di struments a percussion

esemplis

"un cuintet straordenari metût insiemi dai impresaris udinês Meroi e Dollinar: Umberto Cesari daûr dal piano, Miro Graziani ae batarie, Riccardo Laudenzi al trombon e al liron, Aldo Masciolini al clarinet e al sax e Walter Notari al violin e vôs dal grup"

gjavât fûr di "Cuintristorie dal Nûfcent 1950-1960" di Angelo Floramo

batarie s.f.
(ba-ta-ri-e)

[TS] (milit.) Unitât di artiliarie

esemplis

"tun moment si sintì a trai un, doi, trê, … colps di canon, po dute une batarie che dal alt di une culine i smirave ae colone"

gjavât fûr di "Sul agâr" di Pieri Menis

batarie s.f.
(ba-ta-ri-e)

Orghin sessuâl dal om (fig.)

esemplis

"intor di se, il Cilin al veve dome la cjamese. A ogni invocazion, al alçave i braçs adalt esponint in chê maniere denant di Vera [...] dute la batarie"

gjavât fûr di "Veruska" di Ivano Urli

monolengâl