Hai cercato la parola
monolingue
Torna indietro

monolingue

cjatâsi v.pron.tr.
(cja-tâ-si)
Rivâ a vê par se stes alc o cdn. che si cîr, che si à dibisugne e vi..
sinonimi
cjatâ, cjatâ fûr, burî, burî fûr, intivâ, cjapâ, cjoli
esempi
"al cjalave simpri bas cu la sperance di cjatâsi bêçs par tiere"
da "Come tai romançs" di Alan Brusini
"so pari al jere muart e lui al veve scugnût cjatâsi di vore par mantignî la mari e i doi fradis piçui"
da "Trê feminis" di Gianni Gregoricchio
"al scugnive cjatâsi une cjamare e fâsi di mangjâ di bessôl, cussì i bêçs a duravin di plui"
da "Prime di sere" di Carlo Sgorlon
"cundut dal so jessi un emargjinât, al rive a cjatâsi la femine de sô vite"
da "Il cine groenlandês tra art e impegn politic" di Fabian Ros
cjatâsi v.pron.tr.
(cja-tâ-si)
Viodi, vê a ce fâ cun cdn. o alc
sinonimi
cjatâ, intivâ, intivâsi, scuintrâsi, incuintrâsi, scuintrâ, incuintrâ
esempi
"al coreve masse e a un ciert pont si è cjatât i carabinîrs che i àn fat la multe"
cjatâsi v.pron.intr.
(cja-tâ-si)
Lâ tun stes puest par viodisi, par vê un incuintri, par fâ alc insiemi
sinonimi
viodisi
esempi
"se ti va ben o podin cjatâsi une miezorute a tabaiâ"
da "I forescj" di Alan Brusini, Gian Paolo Linda
"al molà dut e al partì cjase par cjase a visâ i cjantôrs che si cjatassin ducj tal indoman par compagnâ il cont e cjantâi lis «recuiis»"
da "Vigji Brusin" di Riedo Pup
cjatâsi v.pron.intr.
(cja-tâ-si)
Di stradis, condots e v.i., lâ tal stes pont
sinonimi
unîsi, zontâsi, lâ adun, vignî adun, butâsi
esempi
"la Fele e cor a cjatâsi cul Tiliment a ret di Puartis "
cjatâsi v.pron.intr.
(cja-tâ-si)
Capî dulà che si è
sinonimi
orientâsi, voltâsi, messedâsi
esempi
"sin vignûts a pît cjapant i trois: ma la ploie e veve fat mil roiuçs e si stentave a cjatâsi"
da "Resurezion a Pontinie" di Pieri Somede dai Marcs
cjatâsi v.pron.intr.
(cja-tâ-si)
Jessi, finî intun ciert lûc, intune cierte situazion e v.i., massime cence previodilu
sinonimi
finî, finîle, jessi, stâ
esempi
"cui che al jentrave tal so tinel al veve la impression di cjatâsi intun Orient mai viodût, o dome al cine"
da "Ombris tal infinît" di Carlo Sgorlon
"cjatantsi in chei stâts, i cinc republichins, che mai plui no si saressin spietâts un assalt a cuatri pas de caserme, a restarin imbambinîts e a butarin lis armis"
da "Il muc" di Roberto Ongaro
"al ven il moment di cjatâsi di bessôl in face dai fats de vite"
da "Trê feminis" di Gianni Gregoricchio
"e fo une fortune pai paîs e pe int da la alte, di cjatâsi a jessi puars e fûr di man: cussì a forin sparagnâts ancje di cheste disgracie [lis scorsadis dai Ongjars]"
da "Cuintristorie dal Friûl fin sot la Italie" di Josef Marchet
"no rivavi a capî a ce distance che mi cjatavi dal vât"
da "Sense" di Checo Tam
cjatâsi v.pron.tr.
(cja-tâ-si)
Vê alc o cdn. intun ciert lûc, intune cierte situazion rispiet a se stes
sinonimi
viodisi, jessi
esempi
"l'om al jentrà che lui, scuasit, nol rivà a inacuarzisi. Si visà dome un moment dopo, cuant che sal cjatà sentât dongje"
da "La tiere di Lansing" di Maria Forte
cjatâsi v.pron.intr.
(cja-tâ-si)
Soredut in espressions negativis, jessi in buine sintonie cun cdn. o cun alc, vê une buine comprension, comunicazion, condivision e v.i. cun cdn. (fig.)
sinonimi
jessi dacuardi, jessi in cunvigne, lâ dacuardi, lâ in cunvigne, capîsi, intindisi
esempi
"in glesie e leve pôc, no si cjatave tra tante int, e po i siei a vevin miôr che e stes a cjase"
da "Nardon e Vigjute di Nani" di Pieri Somede dai Marcs
"al pensà di metisi di bessôl, di vierzi un "studi fotografic" no a Rome, indulà che no si cjatave plui, ma tal so paîs"
da "Il mâl dal mûr" di Lucio Perès
"di istès dut si pleà al mâl e lôr doi no rivarin a cjatâsi nancje te frute"
da "Cjase di Dalban" di Maria Forte
cjatâsi v.pron.intr., v.pron.tr.
(cja-tâ-si)
Vê une posizion, une situazion particolâr in rapuart a altris
esempi
"o crodevi che o viodessin lis robis te stesse maniere e invezit mal soi cjatât cuintri"
Torna in Cima