SuperDizionari

cjaviestri s.m.
(cja-vies-tri)

[TS] (tecn.) Cubie di cenglis o di cuardis par leâ i cuars dai bûs cu la ponte dal tamon dal cjar

esemplis

"ur poià su la cope il jôf, ur impirà tai cuars i cjaviestris e, metût su di se un grabatul e une fassice di lane, cul stombli al segnà une crôs su la nêf"

gjavât fûr di "L'avôt" di Maria Forte

Viôt ancje: cjavestri

cjaviestri adi., s.m.
(cja-vies-tri)

Che, cui che no si adate di opinion, di mût di fâ e v.i., che no si lasse convinci o divoltâ, che nol sint resons

sinonims

cjastron, dûr, durion, insurît, tegnôs, testart, trus, ustinât, roc, rochel, maçûl, maçulat

esemplis

"il perît al jere lât e tornât plui di une volte, simpri cun gnovis propuestis par che no si pestassin, ma simpri dibant. Il plui cjaviestri al jere Nando, che al suspietave di ducj"

gjavât fûr di "Il testament" di Pieri Menis

"fradi fradi ce cjaviestri che tu sês… no tu capissis propit une madocule…"

gjavât fûr di "Un pugn di moscjis" di Pieri Somede dai Marcs

Viôt ancje: cjavestri, scjaviestri

cjaviestri adi., s.m.
(cja-vies-tri)

Che, cui che no si plee aes regulis sociâls, ae dissipline

sinonims

baron, insurît, plaçarûl, rebolât, ribel, bastiancontrari, salvadi, bulo

esemplis

"so fradi Pauli, chel cjaviestri di bulat che nol cognòs ni leç ni regno, lu menave su la biciclete e, saio jo cemût, al è lât a urtâ daprûf di un camion"

gjavât fûr di "Lis predicjis dal muini" di Josef Marchet

"voie di fâ nuie e simpri plui plaçarûi e cjaviestris"

gjavât fûr di "Caritât" di Pieri Somede dai Marcs

cjaviestri adi., s.m.
(cja-vies-tri)

Ancje di plantis, o elements inanimâts o astrats, che a tornin cun indurance, che a resistin, che no si lassin cambiâ (fig.)

esemplis

"la ploie no jere rivade a bati la canicule che, come un cjalcjut, tornave cjaviestre a rimpinâsi su la cope de int scjafoiant la piel tun sudôr tacadiç"

gjavât fûr di "Ah! la provincie" di Sandri Di Suald

"la fonde de vite, mi domandi spes, no restie simpri ferme intal timp obleât e dolç dal madurîsi di une cjariese? O tal dreçâsi cjaviestri de menighe, dopo une bissebove?"

gjavât fûr di "Contis sot spirt" di Raffaele Serafini

monolengâl