SuperDizionari

colôr s.m.
(co-lôr)

Carateristiche che si viôt tun ogjet par vie de lûs che al mande indaûr, che e pues vê diviersis tonalitâts

sinonimi

tinte

esempi

"l'arbul di Nadâl al sflamiave di mil colôrs"

da "Nadâl ancje par Gjelmin" di Pieri Menis

"altris malâts neurologjics a puedin pierdi in maniere seletive la capacitât di ricognossi ogjets o animâi (agnosie visive), o pûr lis musis (prosopoagnosie); altris no rivin plui a viodi i colôrs (acromatopsie), o a sintî i sunôrs (amusie)"

da "La evoluzion dal cerviel e de cussience tai vertebrâts" di Franc Fari

Vedi anche: calôr

colôr s.m.
(co-lôr)

Sostance doprade par colorâ

sinonimi

colorant, vernîs, piture

esempi

"Zuanfrancesc al tornave sù su la armadure, al cjapave in man il pinel, lu tocjave tal colôr"

da "La aghe da pît la cleve" di Dino Virgili

"sui mûrs, cuntun stamp a vevin piturade la sesule e il martiel cul colôr ros"

da "Par stradis lungjis" di Alan Brusini

"Costantin i veve regalade une scjatule grande di colôrs a vueli"

da "Ombris tal infinît" di Carlo Sgorlon

colôr s.m.
(co-lôr)

Colôr de piel umane, massime de muse

sinonimi

carnision, ciere, incolorît

esempi

"cuant che e tornà e veve un biel colôr calm su la muse"

da "La fie çuete" di Maria Forte

"«Sù, bevêt… vuê e je fieste grande… » e cussì bocâi e bocâi di vin a metevin colôr su lis musis dai invidâts"

da "Chei di Muraie" di Pieri Menis

"dome siôr Silvio, che i amîs a clamavin “Smanie”, al pretindè di dîi la sô e intant un colôr sanghin i cjariave il cerneli"

da "Cjase di Dalban" di Maria Forte

colôr s.m.
(co-lôr)

Orientament politic

sinonimi

idee, opinion, partît

esempi

"a son tancj e di ducj i colôrs politics chei che a àn doprât il cuarp di Eluana come «cjamp di bataie» par finalitâts che no jerin i interès di Eluana"

da "Interviste a Amato De Monte" di Christian Romanin

"vebit pazience, idealiscj di ogni colôr, se o fevelìn cussì ordenari"

da "Iresponsabilitât" di Josef Marchet

colôr s.m.
(co-lôr)

Mût vivarôs e carateristic di contâ, di comunicâ e v.i.

sinonimi

vivôr

esempi

"il lôr mût di fevelâ al jere plen di colôr e dispès ancje di ligrie"

da "Ombris tal infinît" di Carlo Sgorlon

"e je vere che, di un cent agn incà, i dialets talians a van pierdint il lôr colôr"

da "Lenghe e lenghis in Italie" di Josef Marchet

colôr s.m.
(co-lôr)

Aspiet, carateristiche che e fâs particolâr un puest, un ambient, un ogjet, une conte e v.i.

sinonimi

clime, atmosfere, savôr

esempi

"[tra i prodots artesanâi in mostre] a 'ndi è un grum che e à il colôr e il savôr de nestre tiere e dal nestri costum, il stamp de nestre anime furlane"

da "Di ca e di là de stangje" di Josef Marchet

colôr s.m.
(co-lôr)

[TS] (zûcs) In cierts zûcs, ognidun dai cuatri pâi

colôr s.m.
(co-lôr)

[TS] (cinem.) Tecniche che e riprodûs i colôrs de realtât

esempi

"la Italie e je stade un dai ultins paîs a fâ emissions televisivis a colôrs, tacant tal 1976"

monolingue