SuperDizionari

complès s.m.
(com-plès)

Grup di personis, robis, elements che a àn carateristichis o finalitâts in comun o che a formin une struture sole

sinonimi

agregât, conession, cumbinazion, insiemi, struture, union, grup, intun, intune

esempi

"ancje deventant cristiane, la popolazion e implantà un complès di cerimoniis diferentis di chês che si fasevin a Rome e a Milan e di li e nassè la liturgjie aquileiese, che e mostrave ce clime di indipendence che al regnave chenti ancjemò in chê volte"

da "Cuintristorie dal Friûl fin sot la Italie" di Josef Marchet

"ah, la vite! Ce complès di siums, di delusions, di fantasiis e di realtâts che si incuintrin e si slontanin fasint e disfant lis sperancis dai oms, come ondis di flum che simpri si mudin di forme"

da "Il muc" di Roberto Ongaro

complès s.m.
(com-plès)

Grup che al fâs musiche

sinonimi

grup

esempi

"dut il program dal festival al è stât cambiât e no si sa cui che al sune… o miôr… tal daûr dai manifescj a son scrits a penarel i nons dai complès che a sunaran gratis dome intune des dôs alis, parcè che chê altre le àn sierade"

da "La maree nere" di Checo Tam

"o fasìn part di un complès corâl"

complès s.m.
(com-plès)

[TS] (psic.) Insiemi di pinsîrs, ricuarts, desideris, in part o dal dut incussients, che si formin vie pe infanzie e che a condizionin in manieris diferentis la vite afetive e il compuartament dal om adult

complès s.m.
(com-plès)

Probleme o malstâ psicologjic

sinonimi

claut, fisse, inibizion, lambic, manie, matetât, menade, ossession, paturnie, sbisie

esempi

"nô no podìn decidi il destin dal mont. O podìn dome fâ la nestre part. Cun dignitât e cence complès"

da "Identitât e mondializazion" di Antoni Beline

"o vin di lavorâ ancjemò tant par che ce che o vin tal cûr al rivi a diliberâsi dai complès di inferioritât e di perifarie che o vin tal cjâf"

da "La autonomie e nas tal cûr, ma e cres tal cjâf" di Sandri Carrozzo

complès adi.
(com-plès)

Costituît de union di plui parts, ancje in ecuilibri delicât tra di lôr

sinonimi

componût, articolât

esempi

"un prin esempli di ce che al sucedeve fin a no tancj agns indaûr al è chel ploiis acidis che, tai agns '70 e '80 a jerin un probleme viodût nome de bande dal incuinament, cence pensâ che la atmosfere al è un sisteme complès, plen di retroazions"

da "Clime e incuinament: prime l'ûf o la gjaline?" di Dario Bianchini Giaiotti, Fulvio Stel

"si à di vê biel clâr che la comunicazion in zornade di vuê e je une vore plui complesse di chê che e jere dôs gjenerazions indaûr, par vie che lis formis de comunicazion a son deventadis plui complessis par ducj, e no dome par une part minoritarie de popolazion"

da "Memoriis di politiche linguistiche" di Adrian Cescje

"il procès di inricjiment dal urani al è une vore complès e al domande tecnologjiis sofisticadis di separazion dai isotops"

da "Un mont cence armis nucleârs. Sfidis sientifichis e tecnologjichis" di Alessandro Pascolini

complès adi.
(com-plès)

Che par vie de sô composizion, struture, articolazion e v.i., al pues jessi dificil di capî

sinonimi

complicât, dificil, dûr, elaborât, imberdeât, incrosât, intorteât, intrigôs, problematic, involuçât, ingredeât, grivi

esempi

"se o viodês un politic, un slogan o un comunicât complès, sigûr che si cjatais devant di un faliment"

da "Comunicâ la autonomie" di Sandri Di Suald

"no je une preclusion ae idee che la lenghe minorizade e puedi veicolâ ancje concets complès"

da "Une esperience di plurilinguisim inte didatiche de matematiche" di Carlo Cecchini, Matteo Fogale

complès adi.
(com-plès)

[BF] Di persone, che e à pês in plui, che e je gruesse

sinonimi

gras, grues, complen, tont, taront, toful, stolf

monolingue